Anang nyadika pelajar siti pekara politik, ku Dennis
MIRI: Kaban Kunsil Nengeri (ADUN) Telang Usan Dennis Ngau minta Menteri Pelajar Dr Maszlee Malik ngabas sekula ba kandang menua ulu Baram ngambi meretika agi gaya penanggul ti ditapi sida.
Ku Dennis, iya enda patut malut pekara pelajar ba nengeri tu enggau penemu politik laban tu tanggungpengawa perintah besai nentuka pelajar diberi pemerat nadai ngira penatai politik.
Iya nyemetak madahka Perintah Pakatan Harapan (PH) patut nunda perintah sebedau tu ti nadai kala ngungkit sekalika nengeri nya nyukung perintah tauka penyakal, tang seruran bejalaika pemansang ba semua nengeri ti begunaka nya.
“Kitai begunaka PH nampung perambu perintah sebedau tu ba pengawa nye- leti, ngemanah tauka ngaga baru sekula ti udah repok kelebih agi kandang menua ulu baka Baram.”
“Pejalaika projek tu lalu enda ibuh kelalu suah berati laban nya semina ngenangguhka projek ngemanah tauka ngaga baru,” ku Dennis.
Iya ngelansa penerang Dr Maszlee Malik apin lama ke udah ti besemaya deka nyeleti sekula repok ba Sarawak taja nengeri tu ukai dibaruh pegai Perintah PH.
Dulu ari nya, Dennis bejadika karnival diatur Serakup Apai Indai enggau Pengajar (PIBG) Sekula Primari (SK) Long Miri dikena ngiga belanja ungkup bejalaika aktiviti sekula.
Iya mega meri peransang ngagai sekula enggau PIBG sereta komuniti ba sitak nya bejalaika inisiatif diri empu nengah kereja beripai nyeleti enggau nyendiaka perengka guna dikena nempa rampa belajar ti meruan.
Ku iya, raban sekula enda patut nganti tauka bepanggai ba opis menteri enti ngaul pengawa mit, tang bejalaika inisiatif diri empu ngereja iya.