Mensia mayuh ditangkan ngambika enda kelalu bendar beirupka arak murah, bisa
SIBU: Mensia mayuh nyengkaum di rumah panjai menua pesisir patut betagang beirupka arak ti dijual enggau rega murah sereta kelalu bisa.
Presiden Parti Bansa Dayak Sarawak ( PBDS) Cobbold John ngenataika jaku lalau tu bepun ari lebih 20 iku orang di Semenanjung Malaysia mati ketegal ngirup arak.
Ku iya, arak ke bisa ti dijual enggau rega ke murah sereta digagaka nama ti manah bela mayuh dijual ba kedai di menua pesisir.
“Aku ukai mantah pengawa beirupka ai bisa tang kitai mesti nemu bagi ke likun agi diirup,” pia ku iya madah ngagai pengarang berita.
Berindik ari penusah ke nyadi nya, ku iya, Opis Pengerai tauka opis ke bukai ti bekaul anang laun meresa kedai ti bisi bejualka arak lebih agi dijual enggau rega ke murah.
“Aku nemu arak baka brandi tauka wiski ukai original bisi dijual ba kedai kupi tauka kedai di menua pesisir.
“Kitai patut nemu beirupka arak murah baka tu tau lebih agi ngasuh kitai ditepan penyakit ari arak ke ‘original’,” ku iya madah baru.
Cobbold madah, kelalu beirupka arak ukai semina enda manahka pengerai tang tau bela mai penusah ngagai ruang bilik.
“Ambika banding enti nyau sakit, kitai enda tegigaka belanja dikena ngidupka bini anak.
“Ukai semina sakit, enti udah kelalu dia ulah beirupka ai bisa baka arak ukai original tau bendar ngasuh kitai mati tumu,” pia ku iya.
Kelimpah ari nya, Cobbold mega mai mensia mayuh baikka ba mengeri tauka di menua pesisir berunding enggau panjai sebedau beambis ayah dikena bebelika arak.
“Manah agi duit dikena kitai meli arak tu disimpan dikena nyengulaka anak tauka dikena ke belanja ruang bilik,” ku iya madah.