‘Mr Kenyalang Strongman’ diperambu deka nyadi program ninting taun di Sibu
SIBU: Residen Bagi Menua Sibu Charles Siaw nerima manah juluk ti deka nyadika pekit ‘Mr Kenyalang Strongman’ nyadi siti program ti diatur ninting taun di Sibu.
Ku iya, pekit nya nyadi siti ari chara ti engkeman dikena ngelakuka Sibu nyadi siti ari palan dagang temuai ti manah di nengeri tu.
“Tu keterubah kitai ngatur pekit ‘Mr Kenyalang Strongman’ kelai ngintu taun kesepuluh Sibu International Base Jump.
“Kitai endang nerima manah langgur penemu nya ti dekaka pekit nya nyadi siti ari program ninting taun. Ari penemu aku, tu ulih nyadi pelasar ti manah endur ngelakuka Sibu laban pesereta bisi mega datai ari luar Sarawak nyengkaum Brunei, Sabah enggau Semenanjung,” ku iya.
Charles madah munyi nya lebuh ti ditemu pengarang berita ba palan endur ngatur pekit nya di Dataran Bandar Sibu Fasa II tu tadi.
Beserimbai enggau nya, Chairman Malaysia Strongman Association (Sarawak) ASP Ricky Poh madah, pesereta ti ngambi bagi iya nya datai ari selampur Sarawak, dua iku pesereta ari Brunei enggau siku ari Selangor lalu siku ari Sabah.
Ku iya, lima pengawa ti digaga sida iya nya Tyre Flip: U90Kgs/90.1 kgs Above & Open, Yoke Walk: U90 Kgs/90.1 kgs Above & Open, Car Deadlift: U90Kgs/90.1 kgs Above & Open, Farmers Walk:U90Kgs/90.1 kgs Above & Open sereta Truck Pull:U90Kgs/90.1 kgs Above & Open.
“Kelimpah ari nya, kitai mega bisi ngaga pekit dikena ngiga pesereta ti deka diberi gelar ‘Mr Kenyalang Strongman 2018’.
“Kitai bisi siti pekit ti enda tau dipadah iya nya semua pesereta ti pemadu nyulut ari tetiap kategori deka dipilih ngambika diberi gelar nya.
“Pesereta ti nerima gelar Mr Sarawak deka dipasukka ke dalam lis Malaysia ungkup dipilih nyereta pekit renggat Asia Pasifik ti deka diatur di Perth, Australia kena ujung taun tu,” ku iya.
Ku iya nambah, pekit nya kala digaga di Kuching, Sri Aman enggau Sarikei lalu ngarap ulih narit mayuh agi penyereta jemah ila.
“Enggau sukung ari Residen, kitai ngarapka program saritu ulih dijadika program ninting taun di Sibu,” ku iya nambah.
Sama bisi datai iya nya Presiden Gerempung Orang Gumpal Isi enggau Angkat Berat Bagi Menua Sibu (SDBWA) Chia Soon Cheng.
Pekit orang kering ‘ Mr Kenyalang Strongman 2018’ ti keterubah digaga di Sibu tu udah nerima sambut ti manah nengah 33 penyereta ti udah ngerejister enggau pekit tu.
Pekit ‘ Mr Kenyalang Strongman 2018’ tu diatur Opis Residen Bagi Menua Sibu enggau SDBWA sereta kerejasama Malaysia Strongman Association (Sarawak).
Berindik ari nya, Andy Gerard ari Sabah udah menggi gelar ‘Mr Kenyalang Strongman 2018’ lalu udah mai pulai perais mata duit RM2,000.
Andy mega udah nyadi champion kategori Men Open Challenges ke mai pulai perais mata duit RM1,000, midul, trofi enggau setipikit.
Nangkan ke nya, Dato Ahmad Zaki ba penuduk lumur dua ti mai pulai mata duit RM500, midul, trofi enggau setipikit.
Penuduk lumur tiga dipenggi pesereta ari Brunei Sazuwan Ali ti mai pulai perais RM300, midul, trofi enggau setipikit.
Champion ba kategori Men Below 90 kg dipenggi pesereta ari Sibu Jutri Tiong ti mai pulai perais mata duit RM2,000, midul, trofi enggau setipikit.
Penuduk lumur dua diempu Hamdan Johnny ti mai pulai RM1,500 sereta midul, trofi enggau setipikit lalu Muhd Hadiah udah megai penuduk lumur tiga lalu mai pulai RM1,000, midul, trofi enggau setipikit.
Ba kategori Men Above 90 kg, champion diempu pesereta ari Sarikei Marcos Enggai ti mai pulai perais mata duit RM2,000, midul, trofi enggau setipikit.
Penuduk lumur dua diempu siku agi pesereta ari Sarikei Yong Chee Hang ti mai pulai RM1,500 sereta midul, trofi enggau setipikit.
Ba penuduk lumur tiga dipenggi pesereta ari Kuching Muhd Ali Najibullah ti mai pulai RM1,000, midul, trofi enggau setipikit.