Sadia-Krian nerima bantu RM12,000 ari Sybestine
KUCHING: Sebengkah gerempung ukai dikuasa perintah (NGO) Sadia-Krian nerima bantu belanja ari orang dagang dikena bejalaika program tulung ngagai pengawa sekula ti diberi nama Program Sadia-Apan.
Siku orang dagang ti gerah jari, Sybestine Gambong meri bantu RM12,000 ngagai Sadia- Apan ba sebengkah pengerami serumpu makai lemai raban NGO apin lama, dikena mantu program nya.
Sybestine madahka diri tekait ati ngagai penerang ari Chairman Sadia- Krian Andrew Paul ti bejalaika program nya ke deka mantu ngemansangka pengawa sekula.
“Aku tekait ati ngagai isi tauka batang program tu sereta ngasaika patut dikerembaika ngagai peranak kitai di menua pesisir.
“Ba mengeri program ti baka tu semina ulih diasaika sekeda orang aja, lalu tu meh kebuah aku mutus ati nyukung pengawa raban NGO ari Sadia-Krian awakka peranak kitai menua pesisir sama ampit.
“Program tu disadang deka diatur ba sekula menua pesisir dalam kandang taun tu, nya alai aku arap bendar nembiak kitai anang lembau masuk program sehari nyema bisi diatur ba sekula kita,” ku iya madah ngagai Utusan Borneo.
Program Sadia-Apan iya nya sebengkah program endur meri runding ngagai raban nembaik pasal penanggul enggau pemujur ke udah ditemu orang ba pengawa sekula nyengkaum bekunsi chara belajar ti engkeman baka SQ3R enggau ke bukai.
Program nya diatur dalam Jaku Iban sereta chukup engkeman enti diatur begulai enggau gerempung ti bekaul enggau Jaku Iban ba sekula.
Andrew berebak enggau tu madahka pengaga ati diri laban bisi orang dagang ke ngembuan runding deka nguji mantu nembiak di menua pesisir nengah pengawa bekunsi penemu pasal ‘Learning Awareness & Study Smart”.
“Kitai amat beterima kasih ngagai Sybestine laban ti ngembuan pengarap ke program tu lalu nulung bejalaika program tu.
“Ke diatu Program Sadia- Apan agi dipejalaika enggau sukung tauka bantu ari mensia mayuh.
“Kami enda milih sapa ti deka enggau beserakup tauka saum ngatur program tauka meri bantu, sekalika ari gerempung, komiti pemansang & pengelikun genturung pendiau (JKKK), parti politik, gerempung apai indai enggau pengajar ( PIBG), alumni tauka gereja, semua diperansang nyaup ngatur program tu lebih agi di menua pesisir,” ku iya.
Naka ke diatu Program Sadia-Apan semina diungkupka ngagai nembiak Pom 4 enggau Pom 6 baruh aja, sereta bala apai indai mega diperansang sama ngulu program awakka nemu nama penanggul enggau pemujur ba pengawa sekula.
Ku Andrew, ba program nya ukai semina meri jaku peransang tang mega bekunsika penemu ke ulih mai pemujur dalam pengawa sekula enggau penemu asil ari pansik ke dipejalaika ba beribu iku nembaik ke udah nyulut ke udah diterima orang ba bidang Psychology, Neuroscience enggau Pedagogy.