Perintah Nengeri begunaka saup baikka ijinsi perintah tauka peribit, nyengkaum rayat dalam ngangkatka ekonomi nengeri tu, ku Wong
KUCHING: Perintah Negeri begunaka kerejasama ari semua piak baikka nya ari ijinsi perintah tauka peribit, nyengkaum rayat nengeri tu ngambi ulih ngangkatka ekonomi Sarawak.
Menteri Dagang Entarabansa enggau E- Dagang, Dato Sri Wong Soon Koh madah Kepala Menteri, Datuk Patinggi Abang Johari Tun Openg keran ngubah Sarawak nengah pekara digital.
Ku iya, semua kitai mereti diak diatu kitai ba dunya ke bebida ke alai teknologi pemadu beguna lalu nadai siti organisasyen tauka orang ulih nyeliah diri ari pemansang teknologi sereta empas teknologi.
“Rindu tauka enda, kitai mesti nitihka singkang teknologi digital ngambi ulih nentuka kitai kering besemekih ba pekara pemansang lalu ngangkatka ekonomi.
“Opis menteri aku bela besaup ngemansangka ekonomi Sarawak nengah platfom digital lalu aku ngarap Ger- empung Insuran Sarawak (PIS) bela nyukung pengeran perintah tu,”ku iya.
Iya mansutka jaku nya ba pengawa Makai Lemai Ngerami Genap 39 Taun PIS ke diatur di siti hotel ditu, malam ensanus.
Ngenang sentang pengawa malam nya, Wong ke mega Menteri Pekara Wang II madah industri insuran ngesan tanggungpengawa berat ba atur nyendia servis rama ngagai komuniti.
Servis insuran ku iya baka ke jaket pengelikun lalu meri pengarap ngagai komuniti maya napi penusah ke enda disadang.
Berindik enggau nya iya ngarap orang ke ba industri insuran nyendia servis ke pemadu manah ngagai komuniti ungkup pemaik pengidup sida jemah ila.
Bela datai Presiden PIS Tommy Li, Chairman Pengatur Pengawa Stephen Yii sereta raban komiti nyengkaum pengari ari kompeni insuran di nengeri tu.
Rindu tauka enda, kitai mesti nitihka singkang teknologi digital ngambi ulih nentuka kitai kering besemekih ba pekara pemansang lalu ngangkatka ekonomi. Dato Sri Wong Soon Koh Menteri Dagang Entarabansa enggau E-Dagang