‘Sarawak Kitchen’ pelasar dikena pedagang nambah penatai pemisi

LUNDU: ‘Sarawak Kitchen’ bisi diatur ninting bisi pengerami tauka karnival ti meri pemaik ngagai raban dagang dikena nambahka penatai pemisi sereta ngelakuka produk pemakai menua tu ngagai bala pengusung.

Menteri Muda Pemansang Dagang Mit enggau Jelan Pemesai (PKS), Datuk Mohd Naroden Majais madahka Sarawak Kitchen tauka dikelala enggau nama ‘ Dapur Sarawak’ meri pengelantang ngagai raban dagang enggau bala pengusung makai tetiap kali atur pengerami.

“Kitai meri nama Sarawak Kitchen ngena nama menua tu tauka endur ngatur pengerami kelebih agi ba tuju ngelakuka produk menua tu.

“”Kitai ngemeratka raban pedagang menua tu bejualka pemakai menua kelimpah nambahka penatai pemisi sida sereta meri pengelantang ngagai bala pengusung,” ku iya.

Iya mansutka jaku nya pen- gudah Bejadika Soft Opening Pesta Lundu 2018 enggau Showcase Usahawan Sarawak sereta Sarawak Kitchen ditu, kemari.

Pesta Lundu 2018 diatur ba Tebingan Lundu pengelama tiga hari berengkah ari Hari Lima tu tadi lalu tembu Hari Minggu (sehari tu).

Beberapa atur pengawa diatur beserimbai enggau Pesta Lundu 2018, iya nya Regata Sungai Batang Kayang, perau dilagu, bemukum, street soccer, pekit muaythai, pekit nikau laja, autoshow, festival kek bulan, panggau pemerindang, pekit karaoke enggau nginti, pengawa mandang enggau bejual ari raban dagang sereta mayuh agi.

Sama bisi datai Kaban Kunsil Nengeri ( ADUN) Tanjong Datu, Datuk Amar Jamilah Anu.

Iya ti mega nyadi Menteri Muda E- Dagang Sarawak madah, Sarawak Kitchen nerima timbal chukup manah ari raban dagang peranak menua tu.

Ngelansa pasal pengawa ngatur Pesta Lundu 2018, ku Naroden, semua aktiviti diatur meri pemaik ngagai komuniti pupu bansa ba nengeri tu.

“Tetiap kali, sebarang aktiviti diatur ulih ngempung enggau ngerapitka kaul komuniti pupu bansa ti sampal datai berami,” ku iya.

Nitih ku iya, atur pengawa meri awak ngagai raban dagang nyual produk menua tu kelebih agi ari genturung pendiau.

“Ari pengerami baka tu, raban dagang menua tu kelebih agi menua pesisir ulih nyual produk sida. Kelimpah ari nya, peminta mensia mayuh tetiap kali pengerami diatur mayuh agi dibida enggau pengawa bejual hari bukai,” ku iya.

Ku iya, opis menteri seruran mantu raban dagang ari sukut perengka guna dikena bedagang tetiap kali atur pengerami nengah bangsal kerejasama enggau komiti ti dipadu gawa.