Perintah nengeri komited ngubah undang-undang dikena nyeliahka penusah ninggang komuniti asal nitihka pemutus kort
KUCHING: Tuju sereta empas ubah ba Kanun Tanah Sarawak baka ti diterangka Sapit Kepala Menteri Datuk Amar Douglas Uggah Embas iya nya dikena ngenukuka enggau rasmi Pemakai Menoa enggau Pulau Galau (PMPG) ti dikumbai ‘Native Territorial Domain’ (NTD) ba ubah nya.
Sebedau ubah ( NTD), Kort Besai udah mutuska PMPG nengah adat Iban nadai ngembuan kuasa undang-undang lalu pengawa bekena sereta penuduk tanah PMPG di baruh adat Iban nya nadai meri sebarang hak ngagai raban ti nuntut tanah nya, pia ku Kaban Kunsil Nengeri (ADUN) Mulu Dato Gerawat Gala, ti mega mandal presiden Parti Pesaka Bumiputera Bersatu (PBB).
Ba reti ke bukai, Kort Besai mutuska PMPG ukai tanah NCR. Pia mega hak ngena tanah PMPG (tauka ‘usufructuary right’) enda diaku kort nyadi adat ti bekaul enggau PMPG laban nadai kuasa undang-undang nitihka pemutus kort, ku iya nerang silik.
Gerawat, ke mega siku luyar meri penerang belalauka jaku Uggah senentang ubah ba Kanun Tanah Sarawak apin lama ke udah ke bekaul enggau NTD ti dikeluarka The Borneo Post kena 19 September 2018 sereta timbal ari raban pengatur Gempuru Besai Bansa Dayak (PKD 2018) dikeluarka surat berita ti sama, sehari udah nya.
Gerawat ngingatka rayat ke alai perintah Sarawak ulih milih enda ngubah Kanun Tanah sereta nurutka pemutus ari kort ti nitihka undangundang menua tang tu deka mai reti ke alai komuniti asal semina ulih ngempu tanah NCR sida tang ukai PMPG sida ti dikumbai NTD ba ubah nya.
NCR ti disebut Gerawat ditu iya nya belalauka kandang menua Temuda Iban (tanah endur diau).
“Nyadi perintah ke komited megai tanggungpengawa ti ngaku enggau meretika gaya penusah ditapi komuniti asal datai ari pemutus kort, bala ketuai perintah kitai bejalaika pengawa ngubah undangundang ngambika ngenuku enggau rasmi lalu bisi empas sentang undang-undang ba PMPG ti dikumbai NTD,” ku iya.
Ubah Seksyen 6A enggau terang madahka NTD diatu ditukuka enggau rasmi nyadi hak ngempu ke alai bala komuniti ulih ngena enggau ngempu tanah nya.
Ubah tu ngagihka pengawa ngeluarka dokumen hak ngempu terus NTD ngagai bala komuniti lalu pala tanah tu manah sereta sah baka pala tanah dikeluar di baruh Seksyen 18 Kanun Tanah.
Ubah tu udah dituku enggau dijaga penuh ari sukut undang- undang ba NTD ngagai bala komuniti asal nengah pengawa ngeluarka pala tanah ngagai NTD.
NTD ukai semina ditatak ngagai ‘ usufructuary right’aja baka ti didawa raban pengatur PKD 2018 ti nyengkaum Serakup Graduet Dayak Sarawak (SDGA) enggau NGO bukai iya nya Dayak National Congress (DNC).
Belalauka usufructuary right Seksyen 6A semina atur pengawa dikena numbuhka NTD, ku iya nerang.
Bala komuniti meseti bekenaka kandang menua nya endur begiga enggau begempuru ke alai usufructuary right ba tanah nya tauka PMPG ti sama ngambika diaku nyadi NTD.
“Bala komuniti asal tentu bisi kebuah beterima kasihka ubah tu laban meri sida ha ngena enggau ngempu tanah (NTD) ti nadai diempu sida sebedau ubah nya,” ku Gerawat.
Tanah NTD bebida ari tanah NCR ti seruran diaku enggau diagih ba Seksyen 5 Kanun Tanah, ku iya nambah.
Tanah NCR iya nya tanah ti udah diperimba enggau ditanam sebedau taun 1957 seraya tanah NTD iya nya tanah kampung (baka ti diagih ba Seksyen 6A Kanun Tanah ti diubah) ti bedau diperimba tauka ditanam tang endur ti besemak tauka besepiak enggau entara tanah NCR lalu dikena bansa asal begigaka pemakai sebedau taun 1957 tauka kenyau ari nya digalau ungkup tuju nya. Tanah NTD iya nya kandang tanah tambah ba tanah NCR baka ti disediaka Kanun Tanah Sarawak.
Sebarang tuduh ti madahka ubah nya udah ngambi tanah NCR tauka enggau chara bukai meri pangka ngagai tanah NCR enggau terang nadai belalauka undang-undang, ku iya nambah.
Kort Besau enggau terang mutuska tanah PMPG ti kelimpah ari nya disebut NTD ukai sebagi ari NCR di baruh Kanun Tanah Sarawak.
Tuduh raban pengatur PKD 2018 ke alai ubah nya udah ngemunaska adat PMPG laban NTD tu ditempa lalu ukai belalauka adat PMPG, ti ngasuh saru penemu, ku iya.
“Taja aku ka nerima ansak ari raban pengatur PKD 2018 ke alai PMPG tu belalauka adat lalu enda patut bepanggai ngagai agih undang-undang, pejurai tu enda ulih diaku sah enggau ngelaban penemu Kort Besai. Nadai ubah PMPG enda deka nerima kelala undang-undang lalu enda patut nyadi hak proprietari ti tau diberi nama enggau diempu komuniti asal,” ku iya.
Ku iya, ulah nyakap Sapit Kepala Menteri kitai lalu nyadi ketuai perintah bansa Dayak pemadu kanan, Datuk Amar Douglas Uggah, ngambi bagi ba debat awam ti dikeluar terus ba TV1 enda engkeman lalu enda deka mutarka sebarang pekara sereta mega nyangka tau ngasuh balat agi charutka isu aggravate inter enggau intracommunity sentiments.
Ngaul diri ba perdebatan tu deka meri peragam raban ti patut menang ngagai orang bukai, ti nyadi perdebatan chukup besibil.
“Aku bisi ati rawan enti chara baka tu deka mantu mutarka bida penemu senentang NTD. Lalu semua bida penemu bepiak ngagai raban PKD. Besai agi reti enti PKD betanya ngagai State Attorney General enggau Majlis Adat Istiadat ti lebih bepenemu senentang ubah bekaul enggau NTD. Datuk Amar Uggah semina madahka diri asa ngagai tuduh PKD 2018 senentang NTD baka ti diagih ba ubah Kanun Tanah apin lama ke udah.”
Gerawat nyamin rayat ke alai perintah Sarawak deka ngaul bala ketuai komuniti asal enggau pemesai perintah bekaul ti ngaul diri enggau tanah bansa asal meri penerang ubah lalu ngemetulka sebarang peragam enggau saru penemu sida.
“Perambu aku ngagai sebarang NGO tauka raban pengatur ti deka ngatur forum tauka program randau bekaul enggau ubah ngambika ngangau enggau ngaul bala speaker ari Attorney General’s Chambers tauka ari Majlis Adat Istiadat laban sida tu raban ti ngaul diri ba pengawa ngelangkar ubah lalu ba pangku pengawa meri penerang enggau ngenukuka ubah,” ku iya.
Kena 19 September, Uggah mansutka penerang nengah surat berita madahka diri tekenyit ke alai bala pengatur PKD 2018 agi enda nemu pasal mekanisme undang-undang baru ba tanah NCR.
Sehari udah nya, bala ketuai PKD 2018 (Patrick Sibat), SDGA (Dr Dusit Jaul) enggau DNC ( Paul Raja) ngeluarka penerang begulai madahka diri asa enggau minta Uggah ngulu ‘debat awam’ ba televisyen pasal pekara nya.
Kaban Kunsil Nengeri (ADUN) Telang Usan Dennis Ngau udah nya ngansak semua komuniti Dayak nyukung Uggah laban iya siku orang ti bejalaika tanggungpengawa ngepunka ubah ba Kanun Tanah Sarawak, enti enda PMPG enda diberi kuasa undang-undang baka sebedau tu.
Nyadi perintah ke komited megai tanggungpengawa ti ngaku enggau meretika gaya penusah ditapi komuniti asal datai ari pemutus kort, bala ketuai perintah kitai bejalaika pengawa ngubah undang-undang ngambika ngenuku enggau rasmi lalu bisi empas sentang undang-undang ba PMPG ti dikumbai NTD. Dato Gerawat Gala ADUN Mulu