Mensia mayuh dilalau ngambika meda silik agi ubat ti diempa
SIBU: Mensia mayuh patut ngadang tauka silik agi maya makai ubat ketegal diatu mayuh ubat bisi dichampur enggau kereban kimia kebukai.
Sapit Direktor Opis Pengerai Nengeri (Farmasi), Abu Hassan Alshaari madah, bisi mega sida ke sakit enda nemu silik pasal ubat ti diambi sida nyengkaum enda nemu nama ubat ke dikena tauka diempa.
“Kelimpah mayuh bansa ubat diatu bisi dicampur enggau kimia, mensia mayuh mega semina bekenaka ubat tang enda nemu nama bagi ubat ke diempa sida.
“Enti nunda kitai mesti nemu enggau silik sebedau kitai bepakaika ubat,” pia ku iya maya bejadi Duta Prihatin Masyarakat beserimbai enggau pengawa ngintu Hari Farmasi Sedunya ke diatur ba Rumah Chendang, Sunggai Assan ditu, kemari.
Nambahka jaku iya, ku Abu, program ke diatur nya siti ari inisiatif mai mensia mayuh ngembuan penemu ke chukup baik bekenaka ubat tauka chara ke engkeman nyimpan ubat di rumah.
Iya madah, sekeda ari tuju program tu iya nya deka ngembing mensia mayuh silik agi nemu bagi ubat ke likun, manah, ngasi sereta enda dichampur enggau kereban ti enda patut.
“Pia mega, ari tu mensia mayuh tau nemu ari ni penatai ubat sida (premis ke bisi lisin), bekenaka ubat nitihka konsep 5B sereta nemu nama penyadi ke bukai enti bepakaika ubat tauka penemu ke patut dikembuan nyema bepakaika ubat lebih ari sebansa,” ku iya madah baru.
Program ke diatur nya disempulang enggau mayuh pengawa ke bukai nyengkaum licha bekaul enggau ubat, meresa pengerai enggau program mandangka ubat.
Kelimpah ari nya, nembiak mit bela diungkupka enggau pekit ngelinsu enggau main ‘Snake and Ladder’.
Bela datai maya program tu iya nya Ketua Cawangan Amalan dan Perkembangan Farmasi Nor Anizah Osman, Ketua Cawangan Pengurusan Farmasi Isruana Basni, Pemesai Farmasi Sibu Siti Khadijah Sahbudin, chairman komiti zon tengah Kimpin Kelala Ubat Nuan Ling Chung Ming enggau Tuai Rumah Edward Chendang Ambau.
Program sehari nya diatur Komiti Penggunaan Ubat Berkualit Zon Tengah.
Hari Farmasi Sedunya disambut 25 September ninting taun lalu taun tu berambaika jaku, Pharmacists: Your Medicines Expert.