UPK KV Betong, KV ERT Setapak, KV Matang deka ngatur ‘Simfoni Kasih 5.0’
KUCHING: Unit Psikologi dan Kerjaya (UPK) Kolej Vokasional Betong begulai enggau UPK KV ERT Setapak ari Selangor sereta UPK KV Matang ari Kuching deka bekerejasama ngatur projek ‘Simfoni Kasih 5.0’ ti diatur bepalan ba Rumah Rosita, Nanga Budu, Krian, Saratok kena 29 nyentuk 30 September tu ila.
“Batang tuju program tu iya nya dikena nerenakka ulah ti ulih bebasaka orang tuai entara sida ke nembiak kelebih agi raban nembiak sekula Kolej Vokasional ti seriris enggau ‘Dasar Warga Emas Negara’ (DWEN), kelimpah ari ngiri penemu bekaul pengawa nyadi ketuai, ngatur program sereta chara komunikasyen enggau mensia mayuh.
“Nengah program tu mega, kami ngarapka raban nembiak ulih madah bekaul enggau peluang pelajar di Kolej Vokasional ngagai peranak di kandang menua nya seraya ngadaka chara pengidup ti bepengerai entara kededua raban ti bekaul,” pia ku Kaunselor Sangin Juat ari KV Betong ti mega siku ari komiti pengatur program tu.
Temuai dipebasa ti diperambu deka bejadika program ti berambai jaku ‘Beseraku Segulai Sejalai’ nya ila iya nya Kaban Parlimen (MP) Saratok ke mega Kaban Kunsil Nengeri (ADUN) Krian Ali anak Biju.
“Mayuh program ti bepelasarka pemansang runding udah diatur kelimpah ari progam lumba enggau main sereta beperea pengerai ti deka digaga raban ari KPJ Sibu ungkup peranak Rumah Rosita sereta sida ke diau di kandang menua nya. Pia mega bisi pekit ‘Simfoni Idol’ sereta nyabut tikit benasit ti deka digaga kena malam 29 September tu ila.