PBDS ngasaika penyarut ti nyadi ba PKR semina ngerugi bansa Dayak

SIBU: Parti Bansa Dayak Sarawak ( PBDS) ngasaika penyarut ke nyadi ba Parti Keadilan Rakyat ( PKR) semina mai pengerugi ngagai bansa Dayak di Sarawak.

Ketuai Pemadah PBDS Bobby William ( gambar) madah, enda ulih dikeenggai penyarut bepun ari pengawa bepilih PKR renggat besai ngerampit ngagai pati parti nya ba renggat baruh.

“Juluk ati PKR tu endang tampak iya nya Reformasi enggau ngangkatka Datuk Seri Anwar Ibrahim nyadi Menteri Besai kelapan.

“Baikka Rafizi ( Rafizi Ramli) tauka Azmin (Datuk Seri Azmin Ali) nyadi sapit iya, nya nadai nyadika penanggul ngagai kitai bansa Dayak.

“Tang, nama kebuah bansa Dayak nyau belaya, pambar ketegal nyukung sida,” pia ku iya madah nengah penerang media, kemari.

Bobby madah, penyukung PKR di Sarawak diatu mayuh agi datai ari bansa Dayak.

“Bisi mega didinga sida enda lantang ati meda Kaban Parlimen Julau Larry Sng enggau apai iya, Datuk Sng Chee Hua tama PKR.

“Nambahka nya, kitai bela ninga berita ti madahka di Sarawak bisi dua bagi tim iya nya Tim Rafizi enggau Sng lalu siti agi tim ke nyukung Azmin.

“PBDS sekali agi mai bala bakih dalam PKR ngingatka Sng tu siku ari orang ti mechahka PBDS suba. Enda patut kitai deka meda pekara tu nyadi baru,” ku iya madah.

Bobby madah, PBDS iran ati meda ulah Anwar baka ke nyukung Sng sereta enda ngibuhka penemu renggat baruh.

“Enda patut Sng ke baru nyadi raban PKR tu dipendingka agi ari Baru Bian.

“Nama penyadi kitai nasib kitai Dayak dalam PKR?,” pia ku iya.

Berindik ari pekara nya, Bobby minta bansa Dayak dalam parti PKR berunding enggau panjai laban pekara nya deka ngubah landskap politik Sarawak dudi hari ila.

Ku iya, semua meseti nemu semina PBDS aja siti parti ti ngeringka nasib bansa Dayak di Malaysia.

Bekaul enggau berita angin madahka bisi parti Dayak baru ditumbuhka ditu, ku iya, nya semina jaku tundi dalam politik aja.

“Nama kebuah patut bisi platform bukai enti tuju kitai endang sama?.

“Ba aku, penumbuh parti baru tu semina mambarka undi rayat Sarawak.

“Nyema tuju sida deka ngeringka hak Dayak, sida endang dikelalu begulai dalam PBDS tauka Sarawak Baru (SB),” ku iya madah baru.

Bobby mega nerangka SB bisi bida enggau Gabungan Parti Sarawak (GPS).

“GPS tu bisi kenaya Barisan Nasional (BN) suba.

“Penumbuh parti baru digaga sida ke dibuai ari parti dikena ngangkatka diri nyadi chalun maya Pengawa Bepilih Nengeri (PRN) ti deka datai,” pia ku iya nerang.