Penanggul nadai tingki, surat pengada ba nembiak sekula menua pesisir patut diputar
MIRI: Gerempung Pengajar Sarawak ( STU) minta perintah nengeri meri perati senentang penanggul dokumentasyen nembiak sekula menua pesisir ti nyadi ninting taun.
Presiden iya, Jisin Nyud madahka raban sida ngaku agi tubah bala nembiak ti puntan besekula ketegal penanggul nadai tingki enggau surat pengada.
“Enti sida nadai surat pengada tauka tingki, sida tu enda ulih nampung pelajar ngagai tikas bukai tauka ngiga kereja,” ku iya ba aum pengarang berita pengudah ngetuaika Bengkel Hak Peranak Bansa Asal Sarawak, kemari.
Jisin ngaku ninting taun bisi dua tauka tiga kes ngaul nembiak puntan besekula semina ketegal bepenanggul ba dokumentasyen.
Berindik ari nya, iya ngansak ejensi perintah bekaul ngerumban atur pengawa rejista dokumentasyen ti ngaul bala nembiak sekula menua pesisir.
Kelimpah ari nya, STU mega dekaka perintah ngambi mayuh agi peranak bansa asal ba sektor perintah nengeri enggau menua tu gawa.
Pekara tu ku iya, penyampau tubuh peranak bansa asal ti gawa ba servis perintah kurang dibida bansa bukai.
“Tu nyadi beberapa resolusyen ti kitai minta perintah meri perati ngambika peranak bansa asal Sarawak nerima hak nitihka pematut,” ku iya.
Antara resolusyen bukai iya nya ngansak perintah ngemasukka sejarah peranak bansa asal Sarawak dalam bup pelajar Sejarah.
Nangkan nya STU mega dekaka perintah nambahka penyampau tubuh ngambi pelajar peranak bansa asal ti deka nampung pelajar ngagai palan pelajar tinggi.
“Kitai mega dekaka pengari peranak bansa asal Sarawak megai pangku pengawa ba pengatur pengawa Yayasan Sarawak.
Kebuah pia laban sida mereti agi isu ti nyadi ba kandang menua pesisir lalu ngiga insiatif mutarka penanggul begulai,” ku iya.
Tambah mega, STU dekaka perintah Pakatan Harapan nyediaka penyikap perengka guna pemun ti menyana agi ungkup peranak asal menua pesisir.
Nitih ku iya, agi bisi kandang menua ti dikelaung ari perengka guna pemun baka bekal kuasa karan, sereta bisi mega agi bepanggai ba injin api.
Sepenyampau 27 iku pengajar ti nyadi kaban STU ngulu bengkel ti diatur pengelama dua hari berunggu berengkah ari ensanus.