Lampu bechura mirah bepun dipanchar ba Jematan Darul Hana, Kubu Margherita
KUCHING: Pengerami Hari Tungkul Ati Sedunya 2018 bisi pengelebih ke alai Jematan Darul Hana enggau Kubu Margherita deka dipanchar lampu chura mirah berengkah malam tu (kemari), ku Menteri Opis Kunsil enggau Berumah Datuk Dr Sim Kui Hian.
Ku iya, pekara nya keterubah diadu dalam sejarah lalu iya meri jaku puji ngagai Datuk Bandar Kuching Utara, Datuk Abang Abdul Wahap Abang Julai.
“Datuk Bandar udah meri sukung lalu matak semua ijinsi ba atur nyendia panchar lampu merah ba kededua ikon mengeri tu,” ku iya.
Dr Sim mansutka jaku nya rambau ngulu Pengerami Hari Tungkul Ati Sedunya 2018 ke diatur di Saradise, BDC ditu, kemari.
Pengerami dipenyadi Tuai Pemegai Menua (TYT) ke mega Chairman Yayasan Tungkul Ati Sarawak Tun Pehin Sri Abdul Taib Mahmud.
Lampu chura mirah nya ku Dr Sim nambah deka manchar Jematan Darul Hana enggau Kubu Margherita nyentuk ngagai malam 29 September 2018 tu.
“Hari Tungkul Ati Sedunya nyadi siti program global ke diintu lebih 200 gerempung dunya ti diperabung Yayasan Tungkul Ati Dunya.
“Taun tu program nungkatka rambai jaku ‘Jantung Saya Jantung Anda’ tauka ‘My Heart Your Heart’ nengah pesan ngempung semua komuniti dunya ngelaban penyakit tungkul ati,” ku Dr. Sim.
Program kemari berengkah jam 5 pagi lalu dirichah eng- gau aktiviti mansutka peluh sereta zumba.
Tanda k- pop bisi mega dibantaika raban nembiak ke ngulu program.
Pengawa beperesa pengerai pechuma bisi mega diatur ngambika penyereta program ulih nemu ikas kolestrol, gula enggau peninggi darah
Pengerami Hari Tungkul Ati Sedunya 2018 dipasuk lebih 2,000 iku orang ke alai Tun Taib sereta bini Toh Puan Datuk Patinggi Ragad Kurdi Taib bisi nyereta aktiviti bejalai kaki.