Tu ulih nyeliah diri ari ngidap penyakit tungkul ati laban penyampau orang ti obesiti majak nambah

KUCHING: Tuai Pemegai Menua ( TYT) Sarawak Tun Pehin Sri Abdul Taib Mahmud ngelalau rayat ngemeranka pengidup ke regas ngambi ulih nyeliah diri ari ngidap penyakit tungkul ati.

Ba jeman ke diatu ku iya, sida ke obesiti sereta enda ngintu pemakai majak nambah kelebih agi raban nembiak.

“Pekara tu jarang nyadi dulu suba, tang udah majak nambah diatu ketegal rayat diatu nadai hari ngemeran pengawa ngemansutka peluh,” ku iya ba pengerami Hari Tungkul Ati Sedunya 2018 di Saradise, BDC ditu kemari.

Ngenang kaul ke sama, Tun Taib madah diri gaga pengudah Yayasan Jantung Sarawak udah melanja Universiti Malaysia Sarawak ( UNIMAS) ngambi ulih ngadu pansik sentang obesiti ba nembiak ke ba tadika.

Ku iya, yayasan diatu be-

Pekara tu jarang nyadi dulu suba, tang udah majak nambah diatu ketegal rayat diatu nadai hari ngemeran pengawa ngemansutka peluh. Tun Pehin Sri Abdul Taib Mahmud TYT Nengeri Sarawak

nung ngadu mayuh program ke bekait enggau pengerai jantung lalu ba ditu meh entiti korporat ulih mantu ke nyadi siti ari program tanggungpengawa rama (CSR).

Iya ke mega Chairman Yayasan Jantung Sarawak ngenataika pengaga pengudah Hari Jantung Sedunya 2018 dipasuk lebih 2,000 iku penyereta.

Program ku iya diatur dikena mandang sukung ngagai tuju Yayasan Jantung Sarawak ti keran deka nerenak pemereti sentang pemerat ngembuan jantung ke kering sereta gerai.

“Aku meransang kita semua berengkah ngelala sakit jantung lalu ngemeranka pengidup ti regas, suah mansutka peluh lalu ngintu pemakai diri.

“Kelimpah ari nya, kitai mega meseti beperesa pengerai lalu ukai nganti diri udah diinggap penyakit,” ku iya.

Kemari, Tun Taib sereta bini Toh Puan Datuk Patinggi Ragad Kurdi Taib bela begulai enggau bala penyereta ba aktiviti bejalai kaki.

Bela datai Menteri Opis Kunsil enggau Berumah Datuk Dr Sim Kui Hian, Datuk Bandar Kuching Utara Datuk Abang Abdul Wahap Abang Julai enggau orang bukai.