Ketuai raban bansa patut ngulu program diatur Pakatan Harapan

KUCHING: Mandal Chairman Parti Tindakan Demokratik (DAP) Sarawak Leon Jimat Donald enda lantang enggau ulah Ketuai raban bansa di kandang menua Undop, Sri Aman ti enda kiruh datai ngulu program ke diatur perintah.

Pekara nya pia pengudah iya beratika nadai siku Pemancha enggau Penghulu datai ngulu program Randau ‘Kepenggunaan’ begulai enggau peranak di Rumah Romeo Serit, Munggu Demam, Batu Lintang kena 21 September tu tadi.

Leon ke mega Chairman DAP Sri Aman mega enda lantang enggau ulah Pemancha sereta Pengulu ti nagang anakbiak sida ngulu program nya.

Program ngundang temuai dipebasa iya nya Sapit Menteri Dagang Dalam Menua, Koperasi enggau Pekara Bebeli Barang (KPDNKK) Chong Chieng Jen.

“Raban ketuai bansa, Pemancha enggau Penghulu ari kandang menua Undop enda datai ngulu program opis menteri tu.

“Sida (pemancha enggau penghulu) mega enda patut nagang rayat ari rumah panjai bukai datai ngulu program.

“Tajapan program udah mujur diadu, tang aku mengkang enda lantang ati ketegal mayuh peranak rumah panjai ditagang datai ngulu program randau enggau menteri,” ku Leon.

Iya nambah, program randau nya enda patut di- jadika pekara politik ketegal program sigi ungkup pemaik peranak rumah panjai.

Ku iya, ulah ke bansa tu patut enda dikereja sida ke nyadi ketuai raban bansa di menua Undop.

Ngenang kaul ke sama, Leon madah Gabungan Parti Sarawak (GPS) pengudah ti ningkilka diri ari Barisan Nasional (BN) madah deka meri kerejasama ngagai Perintah Besai Pakatan Harapan (PH).

“Tang chara sida (raban ketuai bansa) di menua tu enda mandangka sida meri kerejasama,” ku Leon.

Ba program randau nya, Chong bekunsi pekara ke bekaul enggau bida rega barang pengudah Chukai Servis enggau Jual ( SST) diterit nganti Chukai Barang enggau Servis (GST).

Iya ke mega Chairman DAP Sarawak bela nerangka sentang hak tetiap iku kitai ke nyadi orang bebeli barang ngambika penyual enda sengapa ngeletak rega barang.

Penyampau 20 rumah panjai ngelingi menua Undop dikangau ngulu program randau nya.

ADAT: (Duduk dua ari kiba) Serit, Chong enggau Leon ngulu pengawa miring sebedau ngepunka program randau.

NAMA BERITA?: Chong datai ngulu program randau di Rh Romeo Serit, Munggu Demam Undop di Sri aman bedau lama tu tadi. Leon dipeda nampung Chong.

PROGRAM ENGGAU RAYAT: (Ari kanan) Chong enggau Leon ba program randau di Munggu Demam, Undop.