KO Gading nyadi palan penyangkai bisi nyual produk ari Lundu, Sematan
LUNDU: Koperasi Usahawan Gading Mekar Berhad Lundu (KO GADING) nyadi palan penyangkai ‘One Stop Centre’ ungkup pengawa nyual produk raban dagang menua tu, ngelingi Lundu enggau Sematan.
Antarà produk dipansutka menua tu ti tau dijual iya nya produk dikeluar raban dagang Industri Mit Jelan Pemesai ngaul produk pemakai, produk kraf jari, produk betanam betupi, servis, homestay enggau ke bukai.
Pemesai Pelilih Lundu, Awang Putrayusrie Awang Redzuan madah sepenyampau 60 kaban udah rejista datai ari raban dagang menua tu sereta raban nembiak.
Nitih ku iya, nengah KO GADING dikearap produk dipansutka menua tu ulih dibai ngagai serata dunya lalu ari pemisi makit online, produk dagang Lundu tau dijual chara global.
“Pengawa numbuhka koperasi tu ari insentif enggau sukung Kaban Kunsil Nengeri (ADUN) Tanjong Datu, Datuk Amar Jamilah Anu ti dekaka raban dagang enggau peranak menua tu nyual produk sida.
“Ari pengawa tu mega ulih ngempung produk dipansutka menua tu baka produk IKS, kraf jari, produk betanam betupi, pemakai baka keropok, madu kelulut, chabi, rojak, jeruk enggau ke bukai, ulih dijual,” ku iya.
KO GADING deka nyaup ngemansangka sektor ekonomi dagang temuai kandang menua Lundu.
“Ambika chunto, kaul ba program komuniti ngemai bala temuai ngagai ai wong Kpg Sebat Dayak, Sematan ngagai sida ti rindu mandi ba ai wong, meda telaga 7, bungai Raffelsia, kerangan sereta pemanah rampa utai tumbuh enggau utai idup nengah pakej ti bisi disedia.
“Program komuniti tu nyadi chara dipejalaika Opis Pelilih Lundu lalu disukung Datuk Amar Jamilah dikena ngemansangka ekonomi rama sereta infrastruktur kandang menua nya,” ku iya.