Nanta meransang komuniti Foochow di Kapit terus nyukung pengari GPS
KAPIT: Kaban Parlimen (MP) Kapit, Datuk Alexander Nanta Linggi begulai enggau Kaban Kunsil Nengeri (ADUN) Bukit Goram, Jefferson Jamit udah bejadika Balai Mayuh Guna Serakup Foochow Kapit beungkus RM500,000 ba KM3 Jalai Selirik ditu.
“Kitai naka ulih mantu bala serakup sereta aku ulih nyamin deka seruran gawa memanah lalu aku ngarapka komuniti Foochow deka nampung pengawa ungkup bala komuniti. Kitai semua mantu pangan diri lalu perintah nengeri dipegai Gabungan Parti Sarawak (GPS) deka mantu kita,” ku Nanta.
Nanta meri terima kasih ngagai komuniti Foochow ti nadai kala leju meri sukung ngagai iya lebuh bepilih 9 Mei tu tadi. Iya berasai lantang sereta ngandalka sida deka seruran mantaika sukung ngagai Perintah Nengeri maya bepilih nengeri 2021 tu ila lalu ngapil sida meri sukung ngagai Jamit.
Baka selama, Nanta bisi bekunsika gaya politik kemaya hari ba Sarawak begulai enggau bala kaban Serakup Foochow sereta nerangka bala kaban ari PBB, PRS, SUPP enggau PDP diatu badu agi sebilik enggau Barisan Nasional (BN) laban BN diatu nyadi penyakal ba renggat Parlimen.
“Kitai enggai nyadi penyakal lalu tuju kitai iya Politik Pemansang. Kitai dekaka pemansang ungkup rayat lalu kitai nemu Perintah Besai dipegai Pakatan Harapan (PH). Ba parlimen, kitai tau dikumbai ngatika diri, reti iya kitai tau nyukung perintah enti polisi Perintah Besai manahka bansa, manahka Sarawak.
“Taja pia, nyadi peranak Sarawak, kitai tau nyakal sebarang polisi tauka rang undang-undang ti dibantai ba parlimen ti nadai mai pemaik ngagai Sarawak. Kitai berat agi ke pengawa nyaga hak Sarawak enggau nagih Peminta Sarawak.
“Nya kebuah kitai fokus nyapai sempekat pemadu manah ungkup Sarawak ba pekara belanja pemansang, perati manah agi ba pekara ekonomi rama ari pengawa ngemansangka Sarawak sebaka enggau status Semenanjung laban kitai ngasaika tu pekara nyata lebuh kitai numbuhka Malaysia (Sarawak, Sabah, Malaya enggau Singapore) lebuh nya kitai sebela, kitai minta diangkat nyadi menua (wilayah) ti ngemai status sama baka Malaya,” ku Nanta nerang.
Iya ngansak rayat beratika serius baka ni ngaga pemutus maya Bepilih Nengeri dikena numbuhka Perintah Sarawak. Ba penemu iya, manah agi terus enggau GPS ari gempung parti menua tu.
Kebuah pia ku iya, Kepala Menteri Abang Johari enggau Douglas Umbas ngetuaika PBB lalu kitai bisi Professor Sim ngiring parti besai bansa China SUPP, James Masing dalam parti nyauka semua bansa Dayak, PRS mostly sereta mega PDP diketuaika Tiong King Sing, sebuah parti pupu bansa.
“Manah agi kitai peranak Sarawak nyukung parti GPS datai ari Sarawak empu ari nyukung PH ti dikemudika parti ari Semenanjung Malaysia sereta semina bisi pampang aja ditu. Sida tu nerima gerah ari Semenanjung.
“Tejuku Sarawak dipegai peranak Sarawak empu. Tentu mega kitai ulih bekerejasama enggau PH ba renggat Perintah Besai. Tang ba nengeri, manah agi perintah dipegai kitai empu kelebih agi diatu kitai bebendar gawa nagih kuasa megai pemansut asal – minyak enggau gis.
“Mayuh sebana udah dibantai ngelama tu lebuh kitai agi dalam BN, kitai semina diberi 5 peratus aja royalti minyak. Diatu datai ba jam kitai ngubah iya. Tu maya kitai negika hak laban kitai bisi undang-undang baka ‘Oil and Mining Ordinance’ 1956 ti agi relevan sereta mega kitai baru udah ngubah Oil and Mining Ordinance dikena negutka peminta hak kitai ngagai minyak enggau gis ba Sarawak,” ku iya nerang silik.
Lebuh ditanya senentang jaku dipansutka Menteri Besai Dr Mahathir Mohammad ba Kota Kinabalu apin lama ke udah, ke alai status Sabah enggau Sarawak deka dipulai, tu pekara chukup manah, ku Nanta.
“Kitai endang nerima penerang dipansutka Menteri Besai lebuh pengerami ngintu Hari Malaysia kena 16 September tu tadi ba Kota Kinabalu, ti madahka iya setuju mulaika status Sarawak enggau Sabah nyadi sebagi ari empat menua ti sebela status enggau Semenanjung, ari nyadi siti ari nengeri dalam Malaysia.
“Tejuka iya lurus ati, enti sida deka mantaika sebarang randang undang-undang ba parlimen, enti endang amat manahka Sarawak, kitai deka nyukung. Tang dipeda baka mantaika sekeda penemu sida nyangka enda teulihka dua per tiga majoriti. Nya alai, enti sida deka mantaika ba Dewan deka mulaika status kitai, enti terma enggau syarat nya betul enggau ulih diterima kitai, tentu kitai deka nyukung.
“Tang enti sida mantaika pekara ti enda ngemuaska ati kitai, tentu mega kitai deka nulak. Pekara pemadu manah taja enti sema sida enggau mantaika sebarang rang undang-undang, sida semina pulai ngagai pun pekara – Sempekat Malaysia 1963 (MA63) ti asal. Aku pechara, udah chukup klausa dalam sempekat ba status menua kitai ti sebala ti deka lurus ngagai Sarawak.”
Nanta minta bala kaban serakup enti sida ngundi PH lebuh Pengawa Bepilih Besai tu tadi, nya nadai ngawa, tang ba Pengawa Bepilih Nengeri ti deka datai, anang enda nyukung parti kitai empu.
“Perintah besai udah dipegai PH lalu kitai ukai sebagi ari sida nya. Enti Perintah Nengeri mega diberi ngagai sida ngemudi, reti iya, kitai nyangka deka lenyau semua. Nyadi peranak Sarawak kitai meseti nentuka Perintah Sarawak dipegai kitai empu, dikemudika GPS.”
Berebak enggau pengawa sehari nya, Nanta enggau Jamit bisi nyuaka insentif mata duit ngagai bala nembiak sekula ti nyulut enggau patut nerima.
Entara bala bisi datai OCPD Kapit DSP Freddy Bian, Pemesai Pengatur Pengawa Opis Pelilih Kapit Bidah Lujah, Pemesai Pengatur Pengawa Opis Pelilih Bukit Mabong Jason Kong, Temenggong Tan Kian Hoo, Pemancha Yong Thu Fook, Penghulu Sia Shui Poh, Penghulu Wong Kie Ing, Kapitan Yiap yii Hoo, Presiden Serakup Gerempung China (UCA) Sng Geok Yien, Chairman Serakup Kwang Tung Kapit Kong Sien Hua, Kaunsilor Jenny Yii, Kaunsilor David Wong, Chairman Serakup Sii Bang Ee, sereta Chairperson Pengatur Tiong Kiu Lang.