PBDS Baru ngarap Opis Menteri Betanam Betupi enggau perintah nengeri ngaga keretas kereja bekaul pekara tu
SIBU: Parti Bansa Dayak Sarawak ( PBDS) Baru ngarapka Opis Menteri Betanam Betupi enggau perintah nengeri ngaga siti keretas kereja dikena mansik pengawa bumai ngena chara komersial di Sarawak.
Presiden PBDS Baru, Cobbold John madah, tu seririh enggau juluk ati Kepala Menteri Datuk Patinggi Abang Johari Tun Openg ti deka meda Sarawak ulih ngeluarka beras manggai ngagai 70 peratus ba taun 2030 ari 53 peratus baka ke diatu.
“Nya alai, PBDS andal amat perintah nengeri enggau opis menteri bekaul ulih ngaga siti model transformasyen nanam padi chara komersial ditu.
“Enti tu mujur, iya tau bendar ngangkatka tikas penatai pemisi rayat seraya ti nyaup ngemansangka ekonomi nengeri tu,” pia ku iya madah ngagai pengarang berita, kemari.
Cobbold madah, tanah tungga ke menua Batang Rajang engkeman digagaka hub nanam padi komersial bepun ari pemesai tanah sereta enda kala dikereja.
Taja pan baka nya, sebedau digaga, iya minta perintah nengeri meri geran tanah ngagai sida ke beempu tanah ti deka ngereja pengawa bumai komersial dikena nyeliah pekara ke bisi nyadi ba industri kelapa sawit.
“Sebedau projek nya digaga, perintah mesti ngeluarka geran tanah Seksyen 18. Enti enda, rayat deka bepenang- gul ngereja tanah sida.
“Anang enda ingat, tanah adat Bumiputera (NCR) tu enda ulih dijual tauka peda baru kes Hilarian Bisi alai ‘ rega’ tanah NCR semina baka rega enggau Tungkus Asi.
“Geran tanah ngagai rayat ngena Seksyen 18 mega patut dibuka ngagai semua bansa pengawa ekonomi ke bukai ukai semina ditatak ba pengawa betanam aja.
“Enti seksyen tu tebuka dia rayat ke beempu tanah ulih ngaga industri mit, ngaga rumah Dayak, ngaga begunan komersial (baka kedai), ngaga ‘homestay’ sereta iya ke bukai nyengkaum ngaga stesyen minyak.
“Semua tu deka mai penguntung ngagai sida ke beempu tanah,” ku iya madah baru.
Kelimpah ari nya, Cobbold mega ngarapka piak bekaul tau ngaga mayuh agi latih industri ngagai orang betanam betupi lebih agi raban bansa Dayak tauka sida ke bumai.
“Sida tu patut diberi mayuh agi latih tauka bantu bukai baka injin, benih padi betikas tinggi, rachun enggau sum ti manah,” pia ku iya madah.
Enti tu mujur, iya tau bendar ngangkatka tikas penatai pemisi rayat seraya ti nyaup ngemansangka ekonomi nengeri tu. Cobbold John Presiden PBDS Baru