Piak bekuasa patut neritka atur ngagai raban ti nyual ai bisa tiru
KUCHING: Piak bekuasa dipinta bejalaika neritka atur ngagai raban ke ditemu nyual ai bisa tiru kelebih agi ba Sarawak dikena nyeliahka penguna ba nengeri tu kena pangka penanggul ti sama.
Taja pia, Chairman Serakup Sada Penguna Sarawak (COVAS) Michael Tiong ngaku raban bekuasa semina ulih bejalaika atur enti bisi pengeluar chap tiru ngaga ripot.
“Endang enda dikenggai bisi ai bisa tiru tauka mudah dikeluar ba menua tu, sekalika chara belalai tauka sah lalu atur pengawa dipejalai enti bisi kes nyadi.
“Pengeluar ai bisa tiru tu deka napi atur terit raban bekuasa ti relevan enti bisi ripot ari pengeluar chap tulin,” ku iya madah ngagai Utusan Borneo kemari.
Nitih ku Tiong, tebal agi penguna nemu bida ai bisa tiru enggau tulin.
Ngelama tu, enti sida bisi ngasaika ai bisa tu tiru, sida badu agi ngelawa tauka meli ari kedai ke sama, ku iya nambah.
Ngelansa pasal ai bisa murah, ku Tiong, gaya pekara bebida laban tu ngaul sindiket ti kreatif ngiga jalai tama ngagai makit menua tu.
“Kitai enda ulih nyekat ai bisa mudah tama laban tu bekaul enggau sinsiket ti seruran ngiga jalai tama ngagai makit dagang.
“Pengudah tama ngagai makit dagang, sapa bagi deka teulihka penguntung? Semua orang nemu, tentu mega saut iya, penguna.
“Penguna deka meli ai bisa ti bisi kualiti enggau rega mudah,” ku iya.
Pia mega ku iya, enti ai bisa mudah enggau pengimport nitihka semua atur ditetap, raban bekuasa nadai kebuah nyekat ai bisa tama ngagai makit dagang kitai.
“Aku enda meda bisi kebuah lapa raban bekuasa patut nyekat ai bisa mudah tama ngagai makit dagang kitai kelimpah ari kualiti iya ngerusak pengerai,” ku iya.
Iya mansutka jaku nya nimbal penusah ai bisa ngundan rachun ngujungka bebadi nyawa ba sekeda endur di Semenanjung Malaysia, apin lama ke udah.