Klinik Pengerai di Tudan kisuk ketegal sistem dikena ngagauka pesakit rusak
MIRI: Rintai ke panjai ba Klinik Pengerai Tudan ditu kemari nyadi ketegal sistem dikena ngagauka pesakit nya rusak, taja pia nyadi manah baru dalam kandang sejam udah nya.
MP Miri, Dr Michael Teo enggau Mandal Ketuai PKR Menua Voon Shiak Ni udah ngabas klinik nya pengudah nemu pasal sebana ari mensia mayuh bekaul enggau penanggul nya sereta udah betemu enggau ketuai klinik nya, Dr Maurice Steve Utap.
Ku Dr Maurice, ketegal penanggul nya udah ngujungka mensia mayuh berintai panjai muak ke pagi lalu sida ngena meri lumur ngagai pesakit ngena sistem ‘manual’ ngagai pesakit seraya nganti juruteknik ngemanahka mesin nya.
Ku Dr Maurice, sistem dikena ngagauka pesakit nya rusak tumu pagi tadi (kemari) lalu juruteknik berengkah ngemanahka nya pukul 9 pagi.
Berebak enggau nya, Dr Teo madahka atur Dr Maurice ngena sistem manual seraya ke nganti juruteknik ngemanahka sistem nya siti atur ke manah dikena nyeliahka penanggul bukai ari balat agi nyadi di klinik nya.
“Aku gaga ati Dr Maurice ulih mutarka penanggul nya enggau naka penyampat ngena sistem manual laban aku meda penyekut ke nyadi di klinik nya nyema sida lalu nanti juruteknil tembu ngemanahka mesin nya.
“Pengelanang rayat endang dikenuluka perintah besai lalu aku deka nguji ngangkatmanah servis pengerai di Miri,” ku iya.
Klinik nya balat dedat laban ti nerima pesakit entara 700 ngagai 800 iku ninting hari, lalu klinik nya mega nyendiaka servis pengerai ngagai 130,000 iku ari Jalai Pujut 7 nyentuk ke kandang Kuala Baram.