CCRC enggau AMARCo Enterprise nyain sempekat bejalaika projek fertigasyen
KUCHING: Cure & Care Rehabilitation Centre (CCRC) Kuching mujur nyain sempaket pemereti ati (MoU) enggau sebengkah kompeni peribit, bejalaika projek fertigasyen nanam chabi enggau rock melon ba CCRC Kuching.
Chairman Ahli Lembaga Pelawat ( ALP) CCRC Kuching, Tan Sri Datuk Abang Khalid Abang Marzuki madah, projek nya dipejalaika dikena mantu sereta ngajar pelatih betanam ngena chara teknologi fertigasyen.
Tuju ALP bejalaika projek nanam chabi enggau rock melon ngena konsep teknologi fertigasyen dikena meri pengelandik chara teori enggau praktikal ngagai pelatih tauka nembiak CCRC awakka bisi ke bekal lebuh tembu nyereta program berubat enggau nulaika pengerai dalam institusyen.
“Teknologi fertigasyen iya nya chara betanam baru tauka moden, lalu kitai udah bisi sukung ari perintah nengeri nengah ungkup belanja.
“Lalu ngena chara tu kitai ulih ngelatih pelatih ditu belajar ba pengawa betanam, udah nya asil ila deka dijual ke luar sereta asil untung deka dibagi ngagai pelatih ke ngambi bagi ba projek tu.
“Kitai nulung pelatih ditu belajarka pengawa betanam kelimpah ari bejait, woksyop enggau ke bukai, awakka lebuh pansut sida ulih ngemajuka diri, raban bansa sayauka sida sereta sida tu ke dianggap kitai nembiak ulih berubah nuju pengidup ke lebih meruan jemah ila,” ku iya.
Khalid mansutka pekara nya dalam aum pengarang berita, pengudah tembu bejadika Program ‘Sayangi Malaysiaku’ ti diatur CCRC Kuching & Sekolah Tunas Bakti Kuching nengah kerejasama ALP CCRC Kuching ba Dewan Semarak Kasih, CCRC Kuching ditu, kemari.
Dulu ari nya Khalid ngarika ALP CCRC Kuching nyain MoU enggau AMARCo Enterprise ti diarika direktor iya, Awang Mahathir Awang Redzuan.
Bepelasarka penerang berita ke diberi ngagai pengarang berita kemari, rega penyampau semua projek dipelabaka sepenyampau RM83,500.
Projek nya dipasuk urung 25 iku pesereta kelimpah ari pengawa petau dipejalaika pengelama 6 bulan.
Kelimpah ari nya, dalam aum pengarang berita ke sama, Direktor CCRC Kuching Christopher Billy madahka projek nya amat proaktif sereta meri empas ti chukup manah lebih agi ngagai pelatih tauka klien.
Iya madahka pelatih deka diajar chara ngena teknologi fertigasyen nengah pengawa nanam chabi enggau rock melon.
“Ngena pengelandik tu Tan Sri (Khalid) raban ALP sereta CCRC empu ngarapka lebuh pansut ila sida pelatih bisi pengelandik ke ulih dikena ngangkatka pengidup, baka ngemeranka chara nanam fertigasyen tu.
“Projek tu udah berengkah kemari (ensanus) sereta sehari tu (kemari) kitai nyain MoU,” ku iya.
sama bisi datai Prinsipal Asrama Akhlak Kuching ti mega Sapit Kepala pengajar Sekolah Tunas Bakti Awang Madhi Awang Bakar; ALP CCRC Kuching, ALP Sekolah Tunas Bakti Kuching enggau ke bukai.