MasWing dipinta nambahka penerebai ngagai Ba’ Kelalan

MIRI: Peranak menua tanah tinggi Ba’ Kelalan minta MasWing ngatur penerebai tambah, tama enggau pansut ari Ba’ Kelalan ngagai Lawas enggau Miri tiap minggu berindik ari peminta majak ti nambah ari bala temuai ti tama enggau pansut din.

Chairman PBB Ba’ Kelalan, Tadam Arun madahka komuniti di menua diatu enggai enda pan deka nganti dalam lis pansut ari Ba’ Kelalan nyengkaum bala nembiak ti mulaika ari sekula sida enggai enda meseti meranika diri nepan entukar 4WD nengah jalai belingguk ngagai genturung pendiau sida ditu.

“Kitai minta MasWing nyendiaka penerebai tambah dikena nangkup peminta komuniti menua nya nyengkaum bala temuai ti datai enggau pulai ari Ba’ Kelalan,” ku Tadam madah ngagai The Borneo Post kemari.

Nitih ku Tadam, tiap hari semina bisi dua aja penerebai MasWing ti ulih mai 14 iku orang tambang ba tetiap penerebai.

Ku iya, penerebai semina bisi kena Hari Satu, Hari Tiga, Hari Empat enggau Hari Enam aja, ti enda tetangkupka peminta peranak menua nya mindah ari Ba’ Kelalan ngagai Lawas.

Iya madah sinu mega peranak menua ti deka mindah ari Ba’ Kelalan nganti gintir diri ke bisi penuduk deka terebai, sinu amat lebuh dipadah bala staf dia ke alai semua penuduk udah penuh diisi tebal agi bala temuai.

“Bisi maya peranak menua tu diasuh ngulu kereja tauka aum diatur ba Lawas tang enda teulihka penuduk pansut ari Ba’ Kelalan,” ku iya madah nyemetak.

Nitih ku chairman PBB Ba’ Kelalan, udah datai ba maya ke patut MasWing nambahka penerebai ari Lawas enggau pulai baru ke Lawas laban penerebai seruran penuh esereta bisi dipinta ari peranak dia.

Iya nyemetak madahka bala temuai nitihka selama meli tikit sida tama enggau pansut ari Ba’ Kelalan nengah online, tang peranak ditu meli ngena chara manual, nganti bisi penuduk ke puang ari 14 penuduk ba siti penerebai.

Kitai minta ngagai MasWing nyendiaka penerebai tambah kena Hari Dua, Hari Lima enggau Hari Minggu, dikena nangkup peminta ari komuniti menua tu enggau bala temuai ti datai enggau pulai ari Ba’ Kelalan, ku iya nambah.

Baka Ba’ Kelalan mega ukai siti ari beberapa palan ditapatka temuai, ku Tadam, endang patut MasWing enggau pengari rayat tu beratika penanggul ditapi peranak ditu.

“Tu penanggul ditapi peranak ditu ti dibantai ngagai aku lalu aku ngarapka raban bekuasa bekaul ulih mutarka isu tu,” ku iya nambah.

Berebak enggau nya, Kaban Kunsil Nengeri Ba’ Kelalan, Baru Bian lebuh dipinta ngelansa isu nya, enda ulih dikangauka ba awak ke diatu.