Pengawa pengasih dipejalai Hope Place narit ati peranak menua luar
KUCHING: Peranak Australia Rebekah Mccallom deka nunda pengawa dipejalaika Hope Place dikena ngintu pengelantang mensia mayuh ba menua asal iya empu, Thornton, Australia.
Pemungkal Hope Place, Kelvin Wan madah, lebuh Mccallom datai ngagai Kuching ngulu aum besai Gerija, iya sedarka Hope Place udah bejalaika mayuh pengawa pengasih ba Sarawak.
“Nengah bala kaban gerija, Mccallom netapka diri ngelawa Hope Place, deka meda empu pengawa dipejalaika sida. Rambau pejalai nya, iya ngiga penerang baka ni chara iya ulih numbuhka NGO baka kitai enggau atur sereta peminta bukai ti tau ditunda iya ari kitai,” ku Wan lebuh ngelaluka penatai Mccallom ngelawa Hope Place begulai enggau anak lelaki iya, Caleb Mccallom sereta menantu indu iya, Kezia.
Hope Place bejalaika pengawa nganjung pemeri tiga bulan sekali laban mayuh ruang bilik dalam lis peneri- ma sida. Antara bantu ti dianjung Hope Place ngagai raban begunaka bantu, iya nya bantu ngagai raban timpang pendiau ti begunaka susu khas enggau lampin, indai tunggal enggau mayuh anak besekula, sida ti diteju pia aja lalu sida ti ngembuan penatai pemisi kurang ari RM500 sebulan.
Hope Place diatu mantu lebih ari 180 ruang bilik. Penerang silik senentang chara mensia mayuh ulih mantu, sida tau telefon nuju Hot line Hope Place ba lumur 013-567 2775 tauka 082-505 987, berengkah ari pukul 8.30 pagi nyentuk 12 tengah hari enggau pukul 2 lemai nyentuk 5 lemai kena Hari Satu ngagai Hari Lima lalu Hari Enam berengkah ari pukul 9 pagi nyentuk 12 tengah hari aja.