Pasar Kapit begunaka sebuah agi stesyen minyak
KAPIT: Berindik ari penyampau tubuh enggau entukar ti majak mayuh ba jalai bisi pinta ngambika muka stesyen minyak ke bukai dikena nangkup peminta ngisi minyak.
Pengelama setaun tauka dua taun ke udah, orang ti ngempu entukar enggau penguna jalai alun asa laban suah napi penanggul suntuk bekal minyak. Penanggul tu nyadi nyauka ninting minggu meri penanggul besai ngagai sida ti ngempu entukar.
Maya minyak datai entukar endang udah berintai panjai nganti gintir diri ngisi minyak. Tu mega ngasuh sida asa ketegal kelalu panjai berintai nganti gintir ngepam minyak. Tu ngujungka jalai sekut, entukar ti berintai nekul pejalai trafik, lalu ngasuh pejalai trafik tepekul.
Diatu semina bisi dua iti aja stesyen minyak, siti diempu Petronas lalu ke bukai diempu raban nadai kaul enggau gerempung minyak. Kedudua stesyen tu besepiak enggau pangan diri ba Jalai Kubu Lama, tebing sungai Kapit ditu.
Penanggul tu balat ngenusah ketegal suah suntuk bekal minyak. Maya minyak datai dianjung ngena tungkang, orang ti ngempu entukar berintai beberapa jam sebedau datai ba gintir sida ngepam minyak. Tu mega meri empas ngagai orang ti betengahka jalai ke bukai laban semua jalai ba Kapit kelalu sempit enggau sekut lalu mar ditengah.
Nitihka statistik, Stesyen Petronas tetiap bulan puku rata mekal 40,000 liter petrol enggau 90,000 liter diesel.
PasarKapitjampatmansang, kelebih agi penyampau entukar ngenyit nambah. Mensia mayuh ngarapka sebuah stesyen minyak baru digaga ba Jalai Bletih, Jalai Bukit Goram tauka ba Jalai Selirik dikena ngurangka penyekut sereta mega mutarka penanggul jalai sekit ba sepanjai Jalai Kubu Lama.