Teh Telang manahka pengerai
SIBU: Bungai ‘Telang’ tauka nama sainstifik iya, Clitoria Ternatea, lebih ari semina dikena nyura pemakai dikena nyumai ‘asi kerabu’ (asi chura biru Kelantan) ngambika dipeda nyamai.
Emily Galau ari Sarikei udah ngena bungai nya ngaga teh lalu iya berani madah ari pemaik teh biru tu.
Emily nyauka manggai umur 50 taun, iya mega siku orang ti suah meri darah.
“Bisi sekali, aku ditanya lutur lebuh program meri darah, nama pengawa digaga aku ti ngasuh aku nadai hypertension enggau tikas kolestrol aku manah taja pan umur udah majak lunggar.
“Aku madah ngagai lutur, aku ninting hari ngirup teh ‘Telang’,” ku iya lebuh dikerandau ba pekit berapi ti diatur Opis Residen Sibu, beserimbai enggau Sibu BASE Jump Carnivalditu ensanus.
Ku Emily, iya keterubah nemu pasal bungai nya lebuh bekereja ba Kelantan.
Iya madahka diri udah manggai 10 taun ngirup teh nya diatu.
Ngambika teh nya biru, ku iya, tepu bungai idup ke dalam sarang ai lalu iri ai angat.
“Awakka champur nya berendam dalam ai lalu tejuka chelap enda lama sebedau diirup.
“Aku suah agi nambah madu dalam ai teh lalu diirup maya ngirup lemai,” ku iya.
Berebak enggau nya, Hindustan Times dalam artikel ‘online’, 1 Jun taun tu tadi bisi nyebut pemaik pengerai ari teh biru ti ngundan ‘antioksidan’ enggau anti-kemi manis. MARUDI: Menteri Muda Kaunsil Kandang Menua, Datu Dr Penguang Manggil dekaka komuniti menua pesisir ditu begempung agi sereta bekerejasama enggau perintah nengeri ari baruh pegai Gabungan Parti Sarawak ( GPS) ba pengawa negi dikena nyaga hak sida nyadi peranak Sarawak ti udah lenyau ngelama tu.
Beratika pekara tu, Kaban Kunsil Nengeri ( ADUN) Marudi madahka komuniti menua pesisir meseti seruran besaup enggau pangan diri ngambika ulih nyapai juluk ngubah Sarawak nyadi nengeri mansang.
“Aku deka ngelalau komuniti menua pesisir ngambika tetap beserakup sereta bekerejasama enggau perintah nengeri sereta parti ari nengeri tu nengah sukung sida ba pengawa negika hak peranak nengeri tu, ti udah majak lenyau ngelama tu.
Aku deka ngelalau komuniti menua pesisir ngambika tetap beserakup sereta bekerejasama enggau perintah nengeri sereta parti ari nengeri tu nengah sukung sida ba pengawa negika hak peranak nengeri tu, ti udah majak lenyau ngelama tu. Datu Dr Penguang Manggil Menteri Muda Kaunsil Kandang Menua
“Aram kitai begempung ngemansangka nengeri kitai empu sereta nyaga hak kitai ari baruh Sempekat Malaysia 1963 ( MA63),” ku Penguang madah ba jaku dipansutka iya maya Progam Pemesai Begulai Enggau Rayat ba Rumah Kompeni Agon di Tinjar, semak ditu, kemari.
Berebak enggau program nya, Penguang meri penerang ngagai bala ti bisi datai pasal Rang UndangUndang Kanun Tanah ( Ubah) 2018 lalu ngansak sida gawa begulai enggau pengari rayat ba sebarang pekara bekaul enggau tanah Hak Adat Bansa Asal ( NCR).
Iya mega bisi nyuaka tangki ai ngagai peranak rumah panjai nya ngambika bisi alai nimbun ujan lalu bisi dikena bebasu.
Geran Projek Mit Pe- mansang Menua Pesisir ( MRP) sepenyampau RM25,000 udah disua ngagai Komiti Pemansang Enggau Pengelikun Genturung Pendiau ( JKKK) enggau Biro Indu.
Penguang mega bisi ngagihka geran MRP ngagai Biro Indu Rumah Anthony Ladi, Bakong ( RM10,000), JKKK Rh Sabelas Tekalong (RM5,000), Biro Indu Nanga Seridan Tinjar Baram ( RM5,000), JKKK Nanga Seridan Tinjar ( RM20,000) sereta Gerempung Apai Indai enggau Pengajar ( PIBG) Sekula Sekondari ( SMK) Tinjar ( RM25,200).
Sama bisi datai ngulu program nya Sekretari Politik Kepala Menteri Alexander Asing, Pemangku Pemesai Pelilih Beluru SAO Marliney Igil, Chairman Kaunsil Pelilih Marudi Edward Mendai, Pemancha Engah Nuga enggau sekeda bala ketuai komuniti di Marudi.