‘Simfoni Kasih 5.0’ program servis komuniti dikena nempa modal mensia ti menyana
KUCHING: Unit Psikologi dan Kerjaya (UPK) Kolej Vokasional Betong begulai enggau UPK KV ERT Setapak ari Selangor sereta UPK KV Matang ari Kuching deka bekerejasama ngatur program renggat menua ke dikumbai ‘Simfoni Kasih 5.0’ ti diatur bepalan ba Rumah Rosita, Nanga Budu, Krian, Saratok kena 29 nyentuk 30 September tu ila.
Program tu iya nya program ti bepelasarka servis komuniti ke digaga ngaul raban nembiak sekula enggau komuniti dikena nempa modal mensia ti bekualiti ari mayuh sukut ukai semina mekuh sentang pekara akademik aja tang mega ba sukut pemanah ulah sereta tuai runding.
“‘Simfoni Kasih 5.0’ iya nya ti kelima ke udah digaga UPK KV Betong, lalu ba renggat sekali tu, kebuah kitai ngatur program servis komuniti ti bansa tu iya nya dikena nerenakka ulah ti manah ba raban nembiak sekula baka komunikasyen sereta bebasaka pangan diri kelebih agi ungkup orang lunggar umur. Tu berindik ari pemansang teknologi kemaya hari ti dipeda ulh ngenataika empas negatif nyema nadai diembing enggau manah.
“Ketegal dunya teknologi ti majak mansang mega, kitai nangi elemen ti bepelasarka pemanah ulah begulai enggau mensia mayuh deka lenyau kelebih agi ba raban nembiak ti baru deka ngelala dunya luar. Kelimpah ari nya, ulih ngiri penemu bekaul pengawa nyadi ketuai enggau mega baka ni chara ngatur program dikena nyediaka sida (nembiak sekula) napi penguji ba dunya gawa sepengudah tembu sekula jemah ila.
“Nengah program tu mega, kami ngarapka raban nembiak ulih madah bekaul enggau peluang pelajar di Kolej Vokasional ngagai peranak di kandang menua nya seraya ngadaka chara pengidup ti bepengerai entara ked- edua raban ti bekaul,” pia ku Kaunselor Sangin Juat ari KV Betong ti mega siku ari komiti pengatur program tu.
Temuai dipebasa ti diperambu deka bejadika ‘Simfoni Kasih 5.0’ ti berambai jaku ‘Beserakup Segulai Sejalai’ nya ila iya nya Kaban Parlimen (MP) Saratok ke mega Kaban Kunsil Nengeri ( ADUN) Krian Ali anak Biju.
“Mayuh program ti bepelasarka pemansang runding udah diatur kelimpah ari progam lumba enggau main sereta beperesa pengerai ari KPJ Sibu ungkup peranak Rumah Rosita sereta sida ke diau di kandang menua nya. Ungkup sida ke nembiak, bisi mega pekit nyura lalu dikena ngerichahka agi program tu bisi pekit ‘Simfoni Idol’ enggau nyabut tikit benasit ti deka digaga kena malam 29 September tu ila.
“Nya alai, semua peranak di kandang menua nya ditesau sampal datai dikena ngerichahka agi program tu,” ku Sangin madah.