Sekeda jalai deka ditutup beserimbai enggau BIKF Bintulu 2018 kena 26-30 September
BINTULU: Beserimbai enggau Festival LayangLayang Antarabangsa Borneo ( BIKF) Bintulu 2018 kena 26 nyentuk 30 September ba Padang Bilun Lama Bintulu, jalai ba Jalai Sultan Iskandar (seberai SK St Anthony) ngagai lampu trafik Jalai Paragon ditutup enda lama berengkah ari pukul 8 pagi nyentuk pukul 6 lemai sepanjai timpuh pengerami diatur, pia ku Menijar Besai Lembaga Kemajuan Bintulu (BDA) Rodziah Morshidi.
Kelimpah ari nya ku iya, Jalai Besai Abang Galau, Jalai Keppel enggau Jalai Law Gek Soon mega deka ditutup berengkah ari pukul 7.30 pagi nyentuk pukul 8.30 pagi kena 29 September dikena meri awak ngagai pengawa bejalai bebala mayuh pesereta pengerami gudi nya.
“Pengawa matau trafik diperambu deka berengkah ba hari bulan enggau jam ti udah ditetap, tang jam deka berubah bepanggai ba pematut endur nya sereta bepanggai ba runding raban polis trafik enggau raban penerit adat BDA ti gawa jam nya,” ku iya rambau aum pengarang berita ba Wisma Bintulu kemari.
Ku iya, raban penerit adat BDA enggau polis trafik deka dianjung gawa ba endur nya ngambika matau pejalai trafik sereta dikena nyaga pengelikun sida ti betengahka jalai alun ditagang paking sepanjai jalai besemak enggau taba bemain gudi.
“Mensia mayuh ti datai enggau kerita ngagai taba pengerami dilalau bekenaka jalai alternatif bukai.
“Jalai nuju indu mengeri enda ditutup tang mensia mayuh ditangkan ngambika ngatur pejalai sida tumu agi lalu bejimat maya deriba maya atur pengerami,” ku iya nambah.
BDA mega deka nutup Tebingan Promenade Bintulu ngagai mensia mayuh tekala nya lalu deka dibuka baru dalam bulan March 2019.
Agu mensia mayuh mega ditutup ba dia berebak enggau pengawa nutup tebing sungai nya, tuju iya meri awak ngagai pengawa besai ngaga tebing sungai nya.
Akses ngelawa endur nya ditatak lalu endur paking mensia mayuh mega nadai sepanjai pengawa ngaga nya.
Kereja ngintu enggau ngemanah dipejalai ba sebagi ari tebing sungai lalu mensia mayuh dilalau beratika tanda-tanda amaran ti bisi digaga sereta bejejimat ba dalam enggau besemak tebing sungai nya.