STU: Beri tikit bilun enda bebayar ngagai pengajar ti gawa ukai ba menua diri

SIBU: Gerempung Pengajar Sarawak (STU) udah meri langgur penemu meri tikit bilun nadai bebayar ngagai bala pengajar ti gawa ba kandang menua ulu di bagi menua tu ti ukai bagi menua asal sida.

“Ambika chunto, pengajar ari Miri ti gawa ba kandang menua ulu di Balaga tauka pengajar ari Kuching gawa ba kandang menua ulu di Baram tauka pengajar ari Limbang ti gawa ba Kuching.

“Laban Sarawak tu nengeri besai, aku pechaya pekara tu ulih diperunding. Kelimpah ari nya, tu mega ulih dipejalai ba Sabah enggau Semenanjung Malaysia mega,” ku Presiden STU Jisin Nyud madah kemari.

Iya pechaya tu antara chara ke pemadu manah dikena mutarka penanggul suntuk pengajar ba menua pesisir Sarawak.

Jisin nimbal penerang dipansutka Sapit Menteri Pelajar, Teo Nie Ching, apin lama ke udah, ke alai Opis Menteri Pelajar udah numbuhka komiti khas ti deka beratika chara mutarka penanggul suntuk pengajar ba sekeda nengeri kelebih agi di Johor, Selangor, Sabah enggau Sarawak.

Teo diripot madah antara pun pekara ngasuh penanggul suntuk pengajar nyadi ba empat buah nengeri tu iya nya belanja idup tinggi enggau sekula ba kandang menua ulu.

Sapit menteri nya mega bisi mansutka jaku ti madahka penanggul suntuk pengajar ukai semina nyadi ba kandang mengeri baka Johor enggau Selangor aja, tang mega ba kandang menua ulu baka Sabah enggau Sarawak, lalu opis menteri udah bejalaika pengawa mutarka penanggul tu, seraya nambah, tu agi ulih diputar tang sida patut ngiga chara jampat mutarka iya, lalu siti pekara agi, sida berunding deka nambahka bayar elawin dikena matak mayuh agi pengawa ngagai kandang menua napi penanggul nya.

Jisin nyamin opis menteri ke alai STU nyukung pengawa numbuhka komiti kgas beratika chara dikena mutarka penanggul suntuk pengajar ba sekeda nengeri kelebih agi Johor, Selangor, Sabah enggau Sarawak.

Iya setujuka sekeda pun pekara ti ngasuh penanggul suntuk pengajar ba empat buah nengeri tu iya nya belanja idup tinggi enggau sekula jauh ba kandang menua ulu.

“Kitai patut ngiga chara mutar ti manah agi. Siti ari pekara ti diperundingka kami iya nya nambahka bayar elawin ngambika matak mayuh agi pengajar ngagai kandang menua ti napi penanggul tu, kelebih agi ba kandang menua pesisir enggau menua ulu, sebagi ari Sarawak ke alai pengajar napi penanggul belanja idup tinggi.

Seraya Presiden Gempung Pengajar Bumiputera Sarawak (KGBS) Ahmad Malie nyemetak madahka pengawa milih enggau ngambi nembiak belajarka kus ngajar ba sebarang Palan Pematih Pengajar (IPG) ba menua tu kelebih agi peranak Sarawak enggau Sabah patut mega diperati.

Ku Ahmad nambah: “Ba pekara tu, tanka pengawa IPG kelebih agi IPG Kampus Sarawak, Miri enggau IPG Kampus Rajang, Bintangor, ti chukup relevan .”