KEMAS Sarawak gagit deka menang ba pekit Hari Potensi Renggat Menua

KUCHING: KEMAS Sarawak ngembuan juluk tinggi ba pekit Hari Potensi Renggat Menua ti dipelabaka deka diatur kena 22 ngagai 25 November 2018 ba Politeknik Port Dickson Negeri Sembilan.

Dikena nyapai juluk nya, Direktor KEMAS Sarawak, Mohd Zamri Mustajap besemaya deka ngelatih nembiak ke ngarika KEMAS nengeri ba tetiap kategori ke dipekitka.

“Juluk (KEMAS) Sarawak taun tu di Politeknik Port Dickson tinggi, kitai deka agi idup agi ngelaban.

“Sapa ti menang sehari tu, kitai deka nyendiaka latih, kitai deka nyendiaka pakar ngambika nembiak ke ngarika kitai ulih besemekih ba renggat menua ila.

“Kita deka ke bisi lumur ba pekit nya ila,” ku iya, kemari.

Zamri mansutka pekara nya ba jaku pengelalu pengerami nutup Hari Potensi KEMAS Renggat Nengeri Sarawak 2018, ti dipenyadika Direktor Sumber Manusia & Pentadbiran KEMAS Malaysia Ahmad Joharee Mohamed, ti diatur ba Kompleks Nembiak Lum ba enggau Main ditu, kemari.

Nitihku Zamri, urung 800 iku ke bisi datai ngulu Hari Potensi nya ti nyengkaum apai indai, pengajar sereta 370 iku nembiak Tabika KEMAS ari serata Sarawak ti ngarika zon diri empu.

Nyerumba Hari Pontensi nya bisi 11 kategori dipekitka, ke alai champion ba tetiap kategori deka ngarika KEMAS Sarawak ngagai renggat menua.

Asil ari pekit renggat nengeri, entara ke ngarika KEMAS Sarawak ngagai renggat menua iya nya ba Kategori Betanda diarika Zon 3; Kategori Nembiak Nyulut (Zon 6); Kategori Becherita Kategori Lelaki (Zon 3) sereta Kategori Indu ( Zon 4); Kategori Nusui Ensera Potensi KEMAS Lelaki (Zon 1)sereta Katengori Indu (Zon 4); Kategori Pidato Lelaki enggau indu sama diarika Zon 6; pentas Cilik Taska Lelaki (Zon 6) enggau Indu (Zon 2) enggau ke bukai.

“Program ke diatur ba Hari Potensi tu dikearapka muka runding raban bansa sereta meri peluang ngagai ngansah penau enggau pengelandik bala nembiak KEMAS,” ku iya serara madahka meri semengat pemerani ngagai nembiak.