YAB Kepala Menteri Sarawak udah madahka deka meri ungkup belanja sepenyampau RM20 juta ke tuju nya
KUCHING: Opis Menteri Betanam Betupi Moden, Tanah Adat enggau Pemansang Kandang Menua Sarawak deka ngenukuka kompleks tauka begunan opis baru Gerempung Orang Bumai Bekebun Nengeri Sarawak (PPNS) di Samarahan ulih nyadi nyata.
Sapit Kepala Menteri ti mega Menteri opis nya, Datuk Amar Douglas Uggah Embas madah baka ti dipadahka ngagai iya, maya ‘Peladang Nite 2017’, YAB Kepala Menteri Sarawak udah madahka ungkup belanja sepenyampau RM20 juta ke tuju nya.
“Tiga (3) ekar tanah ba kandang endur ‘Pantagon’ Kota Samarahan udah dikemendarka Opis Tanah enggau Survei(JTS), Sarawak ke tuju nya.
“Nya alai, Opis Menteri deka bebendar ngenukuka ungkup belanja dikena ngaga begunan opis baru nya dikejampat ngambika juluk ngembuan kompleks opis PPNS ti disikap ngena palan ICT ulih nyadi nyata.
“Kereban ti baka tu ungkup tauka ke guna Gerempung Orang Bumai Bekebun enggau kaban orang bumai bekebun,” ku iya.
Uggah mansutka penerang nya dalam jaku iya ti dibacha Menteri Muda Betanam Betupi Dr Abdul Rahman Ismail nyerumba bejadika Aum Besai Ninting Taun PPNS Kali Ke-33 ba sebuah hotel tebilang ditu, kemari.
Dulu ari nya dalam jaku pengelalu, Chairman PPNS Datuk Sylvester Entri Muran bisi ngenang pekara nya ti minta perintah ngeyampatka pekara nya.
Nitihku Entri, naka ke diatu proses nyiri konsultan ungkup projek nya benung dipejalaika perintah nengah opis menteri betanam betupi moden, tanah adat enggau pemansang kandang menua.
“Kami orang bumai bekebun ngarapka perintah ngungkupka belanja nya awakka pengawa ngaga opis baru PPNS ulih dilengkaska.
“Juluk kami orang bumai bekebun deka ke opis baru PPNS ulih dikena dalam timpuh 2 ngagai 3 taun ke deka datai sereta semua kereban ICT deka dikena penuh kaban orang bumai bekebun,” ku Entri.
Kelimpah ari nya,Uggah madahka Gerempung Orang Bumai Bekebun bejalaika tanggungpengawa nuju transformasyen menua pesisir.
Nya alai ku iya, gerempung nya patut ngambi peluang ba inisiatif enggau program perintah ba pengawa dagang sereta nambahka penatai pemisi gerempung enggau kaban iya.
Berebak enggau tu Uggah madahka diri temegah ati sereta muji PPNS ti enda kelalu bepanggai ba bantu perintah ke diberi ngena geran enggau dagang ari perintah.
Lalu asil enggau penatai pemisi PPNS tebal agi diulih ari pengawa dagang asal nengah tinda enggau sebut rega ba makit tebuka, ku iya.
“Aku temegah ati ninga PPNS udah ngatika diri ari sukut belanja ba taun ke udahudah. Nengah aum besai ninting taun tu mih penemu ke patut dibantaika dikena nambahka status ekonomi gerempung orang bumai bekebun.
“Penemu ti tajam sereta perambu pengawa dagang ti engkeman tauka ulih dipejalaika patut dikenataika ngagai perintah endur minta bantu, nyema patut.
“Perintah tentu deka berundingka perambu pengawa dagang ke ulih dipejalaika,” ku Uggah seraya madahka gerempung nya diperansang bejalaika tanggungpengawa dalam rentayan bekal pemakai.
Gerempung patut ulih nyemaka pengawa nyual produk kaban gerempung berengkah ari renggat ngeluar, proses enggau nyual.
“Nyema Gerempung Orang Bumai Bekebun sedia bejalaika tanggungpengawa ke regas dalam rentayan pemakai, perintah sedia meri bantu ke patut,” ku iya.