Sarawak bisi hak ngeluarka lisin bekaul enggau pemansut minyak enggau gis
KUCHING: Randau entara perintah besai enggau negeri ba sentang projek Jematan Batang Lupar agi dipejalaika.
Menteri Muda Jalai Tebing Pantai Datuk Julaihi Narawi madah randau nya mega nyengkaum projek jematan bukai ke patut dipelanja perintah besai nengah perintah ke dulu, Barisan Nasional (BN).
“Ya, bisi kaul entara perintah negeri nengah Opis Menteri Pemansang Infrastruktur enggau Perengka Pengangkut sereta Perintah Besai ba sentang Jematan Batang Lupar ke disetuju nengah inisiatif 50-50 maya perintah BN,’ku iya.
Iya mansutka jaku nya ngagai pemberita lebuh ke ngabas projek Sungai Bako ditu, kemari.
Julaihi ngarap perintah besai ulih ngemujur projek nya lalu ungkus deka dibayar 50 peratus perintah negeri enggau 50 peratus agi dibayar Perintah Besai.
Ku iya, projek jematan nya chukup berat ketegal ti deka nyambung projek jalai tebing pantai.
“Diatu, penyuah perengka pengangkut nguna servis feri di Triso lebih 20,000 iti sebulan lalu penyampau tu majak nambah ninting hari,’ku iya.
Kelimpah ari nya, iya madah projek Jematan Rambungan enggau Igan nengah projek jalai tebing pantai deka dipelanja Perintah Besai ke dulu.
Ngenang sentang Jematan Bako pemanjai 280 meter enggau jalai baru nyambung ngagai jematan ba pemanjai tiga kilometer, Julaihi madah projek nya deka tembu digaga ba pun bulan Mei ti deka datai.
Nitihka penerang iya, jematan nuju Kampung Bako nya berengkah digaga kena 3 Mac 2016 lalu disadang tembu kena 12 Oktober tu.
“Jematan Bako pemanjai 280 meter enggau jalai baru nuju jematan pemanjai 3.013 kilometer digaga perintah Gabungan Parti Sarawak (GPS) nengah ungkus RM41.29 juta,” ku iya.
“Projek tu siti entara jalai nyambung kandang menua pesisir ba sepemanjai tebing pantai lalu benung dikereja perintah Negeri.
“Tu siti pengawa dalam polisi ngemansang kandang menua pesisir ke digaga GPS,’ku iya.
Bela datai Kaban Kunsil Nengeri( ADUN) Demak Laut Dr Hazland Abg Hipni enggau orang bukai. KUCHING: Kepala Menteri Datuk Patinggi Abang Johari Tun Openg nyemetak madah nitihka Konstitusyen, Sarawak bisi hak ngeluarka lisin bekaul enggau pemansut minyak enggau gis.
Ku iya, opis bekuasa di Putrajaya mega nemu hak Sarawak ti kebendar iya.
“Kitai bisi hak ngeluarka lisin lalu Petronas iya nya ba bagi pemansang,” ku iya seraya nyebut sentang ungkup khas dalamKonstitusyen Perintah Besai.
Abang Johari mansutka pekara nya lebuh bejaku ngagai rayat Sarawak ke diau sereta belajar ba United Kingdom (UK) maya pengerami gempuru makai lemai diatur Yayasan Sarawak ba Rumah Yayasan Sarawak di Bondesbury Park apin lama.
Nitihku iya, perintah nengeri nengah kompeni minyak enggau gis nengeri, Petros deka bekerejasama enggau Petronas dikena nentuka Sarawak bulih penguntung ari sumber minya enggau gis di Sarawak.
Iya madahka, taja pan hak meri lisin enda kala diteritka kenyau 40 taun ke udah engka laban enda beratikanya, perintah nengeri enda bebatak asur bekaul enggau nama ti diempu Sarawak di baruh undangundang.
Kepala Menteri enggau pengari raban pengari iya ba indu menua Britain nemuai seraya belajar pengelama dua minggu ke UK, Amerika Syarikat enggau Kanada sebedau penemuai kepenudi ke Dubai betemu enggau bisi pengulih beranakka puku.
Ngenang kaul entara perintah nengai enggau perintah besai , iya nganggap nyadi rat laban kededua gawa ke pemerat rayat.
Pasal pengerami malam nya, iya madahka pengaga ati diri laban ulih betemu enggai sekeda nembiak Sarawak di UK ti iya anggap orang ti dikearapka Sarawak jemah ila ngubah ekonomi nengeri ekonomi digital.
Nembiak udah nya berandau enggau chara enda rasmi enggau kepala menteri sereta ngayanka pengerindu dalam pasal chara ti dipejalaika perintah nengeri ba pengawa ngubah ekonomi ari chara lama tauka konvensional ngagai digital.
Abang Johari madah, dalam atur penemuai keterubah nya, iya nemuai ngagai Universiti London enggau Universiti Oxford dikena mansik engka ulih bekerejasama ti ulih muka jalai ngagai nembiak Sarawak diberi endur ba universiti nya dalam pelajar nyengkaum ‘kajian kemanusiaan’.
Nambahka nya, ba atur kedua maya nemuai ke AS, iya deka nemuai ngagai Universiti Stanford laban deka meda kereban enggau aktiviti mansik ba universiti nya dikena beratika prospek kolaborasyen enggau universiti nya sereta universiti bukai di dalam Silicon Valley.
Iya nerang, Sarawak deka neruska pengawa nganjung nembiak ke nampung pelajar ke menua tasik, kelebih agi dalam bidang baru, ti nadai di dalam menua baka pengelikun siber, ‘pengaturcaraan’ enggau sains data.
“Rayat Sarawak patut ngulihka penemu baru dikena nelebaka diri enggau ekosistem baru sereta trend pemansang di serata dunya ti bekenaka teknologi baru,”ku iya.
Abang Johari enggau pengari raban pengari ti nyengkaum ari pemesai perintah nengeri terebai ke San Francisco neruska atur pengawa kedua nemuai seraya belajar nya.