Petros bisi kuasa ba pekara minyak nengeri
KUCHING: Petros bisi hak enda kiruhka Petronas ba sentang hak ba pekara minyak di nengeri, ku Presiden Sarawak Association for Peoples Aspiration (SAPA) Lina Soo.
Bejaku ba aum pengarang berita ditu kemari, Soo netapka Petronas ke patut minta pemendar lalu nitihka penetap Ordinan Ngelumbung Minyak 1958(OMO58).
“Petros megai kuasa ba atur nentuka aktiviti ngelumbung sereta ngeluarka perintah ba pekara ke bekait enggau teknikal sereta wang ngagai Petronas.
‘ Tang ukai berandauka pekara ti tau ngendurka adan enggau hak ke patut empu Sarawak,’ku Soo.
Berindik enggau nya, Soo dekaka Petronas patut nguluka kompeni bukai nitihka penetap OMO58.
Iya madah enti Petronas enggau kompeni bukai betangguh, pekara nya deka mai pengerugi ngagai ekonomi Sarawak.
Sapa ku Soo, teguh enggau penemu diak minyak enggau gis ke bisi dalam kandang adan Sarawak sigi empu Sarawak.
Ku iya, semua peranak Sarawak ngempu pengeraja asal nya lalu ungkup pemaik peranak nengeri jemah ila.
Ngenang kaul ke sama, Soo enda sepenemu enggau jaku seiku orang ti dikelala nengah nama ‘Oilman’ ti nulis ba suratkabar The Borneo Post kena Hari Satu.
Oilman ba berita nya mansutka perambu diak isu minyak enggau gis patut enda dikejaku nyadi pekara politik.
“Nadai kebuah Sarawak patut majak nitihka perintah Petronas lalu nadai kebuah ke nyemetak iya(Oilman) ngenataika perambu isu minyak enggau gis patut enda dikejaku nyadi pekara politik.
“Isu hak Sarawak ba minyak enggau gis balat dikerandau di serata nengeri, ba kedai kupi nyentuk ngagai kaki lima lalu balat agi ba media rama,’ku Soo.
Iya netapka isu nya udah nyadi seiti isu politik ke besai ke bekait enggau hak Sarawak sereta ulah ngelanggar Sempekat Malaysia 1963(MA63), Konstitusyen Sarawak nyengkaum Konstitusyen Perintah Besai.
Pekara nya ku Soo udah ngujungka Sarawak seranta sereta nadai pemansang dalam timpuh 44 taun.
“SAPA ukai minta Petronas tauka kompeni bukai di Sarawak ngetuka operasyen sida munyika jaku sindir Oilman.
“Tang minta kompeni tu minta lisin ngelumbung lalu mayar royalti sereta chukai bukai ke bekait ti udah diteritka Perintah Sarawak,’ku Soo.
Iya ngarap Perintah Sarawak meretika sentimen peranak nengeri ti begedika ulah Perintah Besai ngelanggar MA63 nengah atur ngubah adan kuasa lalu nguna PDA sereta TSA ngerampas pengeraja asal Sarawak.