Taja pan chukai nya kebendar meri penatai pemisi ngagai nengeri tang nya bisi meri empas ba pekebun mit sawit
KUCHING: Orang bumai bekebun minta perintah ngambika nginsil 5 peratus chukai nyual minyak sawit, ke pengelantang enggau penguntung pekebun mit kelapa sawit ba nengeri tu.
Chairman Gerempung Orang Bumai Bekebun Nengeri Sarawak (PPNS), Datuk Sylvester Entri Muran madahka sebana bekaul enggau chukai nya suah amat dikenataika semua kaban Pertubuhan Peladang Kawasan (PPK).
Entri ti ngarika PPNS enggau PPK serata Sarawak ngarapka perintah ulih beratika pekara taja pan chukai nya kebendar meri penatai pemisi ngagai nengeri.
“Raban orang bumai bekebun agi ngapil ngagai perintah ngambika nginsil 5 peratus chukai nyual minyak kelapa sawit ungkup pekebun mit kelapa sawit ti kurang ari 100 ekar aja.
“Chukai tu udah ngujungka rega Buah Tandan Baru (FFB) ti dichukai pengilang Minyak Kelapa Sawit.
“Pekara tu suah dipinta kelebih agi maya kami baum. Aku nemu chukai tu sebagi ari penatai pemisi perintah nengeri tang enti kita (perintah) nguji ngaduka nya, tu deka meri penguntung terus ngagai kaban Gerempung Orang Bumai Bekebun,” ku iya.
Entri mansutka pekara nya dalam jaku pengelalu pengawa bejadika Aum Besai Ninting Taun PPNS Kali Ke33 ti diatur ba sebuah hotel tebilang ditu kemari.
Aum besai nya ti digulu 170 iku kaban gerempung orang bumai bekebun ari semua 28 PPK serata Sarawak, ti dipenyadika Menteri Muda Betanam Betupi ke ngarika Sapit Kepala Menteri ti mega Menteri Betanam Betupi Moden, Tanah Adat enggau Pemansang Kandang Menua, Datuk Amar Douglas Uggah Embas.
Nambahka nya Entri madah dikena ngenegapka Gerempung Orang Bumai Bekebun ba nengeri tu, raban orang bumai bekebun ngarapka perintah ulih mekuh ngagai pemansang di menua pesisir ti bisi urung 170,000 iku kaban orang bumai bekebun.
Berindik ari pekara nya kami PPNS sereta PPK serata nengeri Sarawak meri perambu ngagai perintah ngambika numbuhka sebengkah badan korporat perintah, ti lebih mekuh ngagai pengawa ngangkatka sosioekonomi kaban tu, ku iya.
Perintah nengah badan korporat nya ku iya, ulih ngaga polisi enggau terus meri ungkup ngagai Gerempung Orang Bumai Bekebun ngambika disadung ngagai kaban PPK dikena bejalaika pemansang projek ti nguntungka.
“Kami raban orang bumai bekebun enda ngetu nyebut pekara tu nyentukka sebengkah badan korporat ti nyaga pemerat kami ditumbuhka.
“Nengah penumbuh badan korporat nya, dia orang bumai bekebun deka bisi Direktor Orang Bumai Bekebun Nengeri awakka ulih bejalaika sereta nambahka aktiviti khas ungkup kaban PPK.
“Direktor Orang Bumai Bekebun Nengeri amat diguna dikena meri servis ti sikar sereta ngasi agi ngagai kami kaban orang bumai bekebun,” ku iya ti ngenataika sekeda perambu sereta peminta ngagai perintah nengah Opis Menteri Betanam Betupi Moden, Tanah Adat enggau Pemansang Kandang Menua.