Ling temegah enggau penetap penemu Baru bekaul penyalah mai suap
MIRI: Sekretari Pakatan Harapan (PH) Sarawak ke mega senator Alan Ling Sie Kiong ngelaluka penetap penemu Menteri Kereja Raya, Baru Bian, dikena mutarka penyalah makai suap sereta madahka undang- undang meseti dipejalaika.
“Nadai disangkal agi, kitai bebendar ba pengawa ngemunaska ulah makai suap, taja atur nitihka pematut meseti diberi nitihka kebuah ke patut dikena bejalaika iya,” ku Ling lebuh dipinta ngenang pasal ulah makai suap ti bekaul enggau sekretari politik Menteri Kereja Raya.
Ku iya, udah nyadi hak tetiap iku orang ngaga sebarang ripot ti nuduh orang bukai ngereja penyalah tauka salah pengawa, tang rayat patut bela sedarka pansik bedau ngenukuka orang nya salah.
Ling, ke mega gawa nyadi luyar, nyemetak madah taja ba renggat dawa, orang nya dikumbai bedau salah nyentuk ke iya ditukuka salah, tu prinsip undang-undang dunya ti meseti diaku.
“Tentu mega kami melabaka pengawa jampat dipejalaika raban bekuasa dalam kes ke alai bukti ti bekaul kes udah bisi tauka penyalah nyata.”
Alan Ling, ti dichiri nyadi senator apin lama ke udah, ngarapka raban bekuasa ti bekaul deka jampat bejalaika atur enggau nadai penangi tauka bechiping.
“Aku temegah ati macha penerang dipansutka Menteri Kereja Raya ti nerima pengawa mansik silik dipejalai tekala nya, tu nunjukka pengeran PH ngemudika perintah ti beresi enggau nerenakka ulah ti manah ba atur pengawa.”
Iya madahka pemesai gawa perintah ti megai mangku pen- gawa bepelasarka pengarap, nya alai sebarang salahguna kuasa iya nya enda bejalaika tanggungpengawa ngagai rayat ti ngelempaika pengandal ngagai sida.
“Ari baruh pegai perintah PH, nadai siku pemesai gawa perintah dikemendar beambi ulih ke pengaya diri empu nengah penuduk sida, semua orang meseti terang pasal pekara tu.
Berebak enggau nya, iya meri langgur penemu ngagai sida ti ngasaika diri empu dipanjuk tauka sida pechayaka diri nadai salah napi pemar ketegal tuduh baka ti diripot, sida bisi hak undang-undang meri penerang senentang pekara nya ba mua mayuh tauka nengah atur pengawa mansik.
Presiden PKR ti dipilih enggau deka dipadu nyadi Menteri Besai, Dato Seri Anwar Ibrahim tekenyit enggau pekara nya lalu sebarang pemutus ti deka dipejalai ngagai sekretari politik Menteri Kereja Raja ti dituduh salahguna penuduk iya ba pengawa bepilih PKR bepanggai ba raban bekuasa nagang makai suap.
Koordinator Raban Nembiak PKR, Ahmad Syukri Che Ab Razak ngaga ripot kena Hari Dua minggu tu tadi ngagai Komiti Nagang Pengawa Makai Suap Malaysia (MACC), nuduh pemantu kanan Baru Bian udah salah guna kuasa nginti sukung bala ketuai parti menu aba Pahang.
Ba aum pengarang berita ba indu opis PKR ditu kena malam Hari Dua, Anwar madahka iya deka berandau enggau (Menteri Kereja Raya) Baru Bian kena Hari Tiga minta penerang senentang isu nya.