Apai indai ti ngembuan anak OKU diansak ngerejista sida ba PDK Bekenu
MIRI: Komuniti di Bekenu deka andal laban diatu udah ditumbuh sekula ‘Community- Based Rehabilitation’ (PDK) ungkup nembiak ti begunaka bantu khas ungkup semua nembiak ti nyelai pendiau (OKU) ba No. 97A, Jalai Masjid, Kampung Dagang, Bekenu.
Nitih ku orang ti nyaga ( spuervisor) sekula PDK Bekenu Norlida Batiil madahka peranak di kandang menua nya bedau agi nemu bisi palan tauka sekula ungkup nembiak ti nyelai pendiau ke begunaka bantu khas di Bekenu lalu sida deka madah ngagai komuniti bekaul enggau penumbuh sekula tu.
“Aku deka ngangau bala apai indai ti bisi anak ke begunaka bantu khas ngambi ngerejista anak sida ngagai ba PDK Bekenu ditu laban diatu udah dibuka ungkup rejista,” ku Norlida madah ngagai The Borneo Post kemari.
Ku Norlida, diatu penyampau sida ke ngerejista ba PDK Bekenu agi bedau mayuh, nyangka berindik ari sekula nya ti baru dibuka di kandang menua nya lalu beguna mensia mayuh ngambi nesau pekara tu ngagai komuniti kelebih agi ti ba sitak tu.
Ku iya, guna program ‘pemulihan’ dalam PDK tu iya nya dikena sida ke nyelai pendiau ti benung dalam proses latih pemun baka bejalai, pelajar khas sereta pengelandik dalam pengidup besehari-hari.
Ku iya, program sekula nya tebuka ungkup semua nembiak OKU ari semua bansa penyelai ti ngemeranka kerejasama entara sekula enggau apai indai nembiak.
Norlida nandu, mayuh sektor dalam perambu enggau agih belanja ungkup servis sereta guna PDK Bekenu lalu tu nyadi pelasar dikena ngiri penemu ba raban nembiak ti begunaka bantu khas tu.
Ku iya, raban nembiak ti ulih berejista ba PDK Bekenu tu iya nya sida ti bisi ngembuan kad OKU ari Opis Pengelantan Pendiau ari umur 3 taun nyentuk 45 taun.
Ku iya, bayar taun ungkup siku nembiak iya nya RM12 lalu bayar bulan iya nya RM10 ungkup siku nembiak.
PDK Bekenu tu deka beoperasyen berengkah Hari Satu nyentuk Hari Empat ari pukul 8 pagi ngagai 12 tengahari.
Penerang ti silik bekaul pekara tu ulih betelefon ngagai Norlida ba lumur 01133181783 tauka chairladu PDK Bekenu Sim Guek Lan (019-8265587).