Pekit Nginti beserimbai Pengerami Ngintu 150 Taun DUN Sarawak deka diatur 5-7 Oktober di Mukah
MUKAH: Peranak di Mukah sereta di selampur Sarawak dikangau datai nyereta Pekit Nginti beserimbai enggau Pengerami Ngintu 150 Taun Kunsil Nengeri (DUN) Sarawak ti digaga kena 5 nyentuk 7 Oktober tu ila di Mukah.
Nitih ku Kaban Kunsil Nengeri (ADUN) Balingian Abdul Yakub Arbi, kelimpah ari pekit nginti, bisi mega aktiviti bukai udah diatur dikena ngerichahka agi pengerami nya pengelama tiga hari berunggu.
“Kelimpah ari pekit nginti (tasik enggau sungai), sama mega bisi diatur aktiviti bukai baka Bemukun, main sereta ‘sukan rakyat’, Mukah Kitchen enggau mayuh agi,” ku iya madah ba pengerami Nyuaka Geran Projek Mit Menua Pesisir (MRP) ngagai sekeda raban tauka gerempung di Mukah kena Hari Tiga tu tadi.
Pia mega bisi disediaka bangsal endur bejualka mayuh macham perengka asil pengelandik jari ti sama bisi maya nya ila semanjai program nya.
Ba kenang ke bukai, iya udah nyuaka geran MRP ngagai Gerempung Melanau Mukah ungkup ngatur ‘Regatta Mukah’ ti deka digaga kena 26 nyentuk 28 Oktober tu ila.
Kelimpah ari nya, penerima MRP iya nya ari kelab ejensi perintah sereta gerempung ungkup sida bejalaika aktiviti semanjai taun.
Ku iya, tu siti ari kelai ngenang basa ari perintah nengeri ngagai semua staf perintah kelebih agi komuniti di Mukah.
“Tu mega kelai perintah nengeri endang seruran ngenang pemanah gawa staf perintah ti seruran meri servis enggau nyulut ngagai komuniti di Mukah,” ku iya.
Beserimbai enggau nya, semua aktiviti ti diatur sida ke nerima geran tu mega meseti bepelasarka pengawa negapka kaul sereta meri peransang, ngangkatka gaya pengidup ti bepengerai kelebih agi ti bekaul enggau gaya kereja.
Penyampau MRP ti disua iya nya RM89,000 ti ngaul 14 iku penerima ungkup sitak Balingian.
Sama bisi datai Pemesai Pelilih Mukah Shafrie Saili enggau ketuai komuniti Mukah Temenggong Hendi Suhai.