Rabies: Peranak Miri dilalau bejimat ari kena ketup ukui

MIRI: Peranak Miri dilalau ngambika seruran bejimat dikena nyeliah diri ari kena ketup ukui lebih agi ke bisi virus rabies.

Kaban Kunsil Nengeri (ADUN) Piasau Datuk Sebastian Ting madah, taja bedau bisi peranak ditu kena virus nya tang sida enda ulih ngumbai nya enda tau nganu laban ke mungkur pengelikun mensia mayuh.

“Agi nadai peranak Miri kena virus rabies laban naka tu semina ngerampit ukui. Tang aku ngelalau peranak Miri bejimat-jimat.

“Ngagai sida ke ngempu ukui enggau mayau, aku ngelalau sida anang ngelepaska jelu nya ba luar rumah nangika kena rampit,” ku iya madah ngagai pemberita pengudah ngabas Opis Pengerai Bagi Menua Miri, ensana.

Sebastian madah, Opis Veterinar ngenuku sampel ke diambi ari ukui ba sitak Piasau Jaya enggau Lutong positif virus rabies.

Iya madah, nyema kena ketup, orang nya patut nitih atur ke patut baka nuchi abi kena ketup pengelama 15 minit ba ai ke benung anyut lalu berumban berubat.

Dulu ari nya, Sebastian mendingka taklimat pasal penyikap napi kena rampit virus rabies di Miri ari pemesai senior Opis Pengerai Bagi Menua Miri nyengkaum Direktor Sepital Miri Dr Jack Wong.

Iya madah. Opis Pengerai Bagi Menua Miri enggau Sepital Miri udah nyikap diri nyema bisi nyadi kes nya ngerampit mensia.

“Naka tu aku udah dipadah vaksin ungkup mensia ba sepital chukup,” ku iya.

Kemari, Sarawak madahka lima sitak baru bisi rabies iya nya Jalai Teng Chin Hua di Sibu, Jalai Kilang (Bintangor), Meradong, Sarikei, Jalai Padang Bilun Lama Kapit), Piasau Jaya enggau Lutong Shell, Miri.

Komiti Pengatur Penusah Ngenyit Nengeri Nengeri (JBPN) Sarawak madah, tu ngujungka penyampau sitak positif rabies nambah ngagai 41 naka tu.