Tumbuhka komiti khas ngaga ripot pasal tikas penyalah nembiak ba sekula
SIBU: Opis Menteri Pelajar diansak numbuhka komiti khas bejalaika pansik enggau ngaga ripot pasal tikas penyalah bala nembiak ba sekula.
Mandal Chairman Kanan Malaysia Crime Prevention Foundation (MCPF), Tan Sri Lee Lam Thye, ti meri langgur penemu tu, nyemetak madahka pansik nya patut ngambika opis bekuasa nemu naka pemalat penyalah nembiak lalu kaul sida ba dadah, penyalah berat enggau isu rama bukai.
Kelimpah ari salah guna dadah, penanggul rama buai ti ngaul bala nembiak baka enda nurun besekula, nginsap, beduan enggau bayat meseti mega diperunding, ku iya.
Ku iya nambah, komiti khas patut datai ari bala penau/par ba bidang bekaul sida empu ti ulih meretika gaya pekara enggau pemutar praktikal sereta timpuh panjai penanggul penyalah ba sekula.
Iya udah nya meri perambu ke alai komiti khas patut mega nyerenih enggau beratika baru Akta Pelajar 1996 (Akta 550) sereta atur bukai dikena nyerenih enggau nentu sekalika sida agi ulih tetangkupka pemar ba penyalah raban nembiak.
“Baka bisi gaya ulah ti kasar bala nembiak ba Malaysia tang sinu amat, nadai penerang ti chukup ngayanka pemalat iya.
“KItai suah macham penyalah nembiak tang kitai enda entu nemu baka ni pemalat penanggul nya lalu tu mangka pengidup dudi hari bala nembiak.
“Ngambika kitai meretika penanggul enggau kebuah iya nyadi, pansik meseti dipejalai dikena beratika pemalat pen- anggul tu,” ku iya ba penerang berita kemari.
Lee nyemetak madahka ba mayuh pekara ti nyadi, kepala sekula enggau pengatur pengawa deka nyalamka penanggul baka nya dikena nyaga pemanah nama sekula sida.
Tambah mega kua iya, subjek penyalah ba sekula udah bisi kenyau ari suba.
Ulah bejamah raban nembiak maya umur biak udah kala nyadi, tang dipeda majak niki diatu, sebagi ari iya ketegal bungkur media ti besai.
Lee madahka pakar psikologi nembiak mit enggau nembiak udah mantaika penerang bala anak kitai diatu nadai orang besai tuai nyadika teladan sida ba rumah enggau sekula, lalu deka agi nunda ulah kasar nyengkaum ari apai indai enggau komuniti ti sama pendiau tauka nunda ari pekara dipeda sida ba media rama.
Iya ngaku penanggul tau mega dikait enggau sakit pengerai untak majak nambah ba menua tu kenyau ari National Health and Morbidity Survey 2015 ngayanka urung 4.2 juta peranak Malaysia beumur 16 taun enggau ti tuai agi napi penanggul runding.
Belalauka pekara tu, Lee bisi penemu, endang patut numbuhka komiti khas mansik penanggul tu sereta ngaga analisis ngambika raban bekuasa ulih ngelala pun, mansik pugu pekara sereta ngiga chara mutar ba penanggul tu.
“Asil pansik tu tau dikena komiti khas merambu atur pengawa ti patut dikena mantu ngintu pemerat nembiak sekula sereta mega beratika pengelemi sistem pelajar kitai, kelebih agi bekaul enggau atur pengawa sekula,” ku iya merambu.