Brooke Dockyard nyerahka projek pelantar, ’Jacket’ tumu ari timpuh ditetap
KUCHING: Pelantar enggau ‘Jacket’ ti digaga Brooke Dockyard and Engineering Work Corporation ungkup projek Anjung Gas Development udah diserahka ngagai Petronas Carigali Sdn Bhd (PETRONAS) dulu ari timpuh ke udah ditetapka.
Chairman Brooke Dockyard and Engineering Work Corporation, Datuk Abang Abdul Karim Abang Openg madahka, kerejasama bejalaika projek Provision of Engineering, Procurement, Construction and Commisioning (EPCC) Anjung enggau PETRONAS disain kena 18 Ogos 2017.
Iya madahka nengah projek nya, Brooke Dockyard mujur nyapai dua penyulut besai iya nya mujur nembuka ‘pile conductor’ enggau substruktur projek anjung dulu ari timpuh ke udah ditetapka sereta Jacket iya nya substruktur projek PETRONAS keterubah ti digaga ba Demak Fabrication Yard ke baru.
“Projek tu tembu dulu ari timpuh ke udah ditetapka iya nya ungkup piles, conductors and substruktur.
“Substruktur mujur dipenuhka kena 29 September 2018, tu ngayanka kelai penyulut ti pemadu beguna ti nyadi substruktur keterubah digaga ba Demak Yard.
“Lalu substruktur Anjung ditimpuhka belayar ngagai palan kepenudi tasik Bintulu kena 5 Oktober 2018,” ku iya.
Abdul Karim mansutka pekara nya lebuh bejaku ba pengerami ‘ Sail Away for EPCC Anjung Substructure Project’ ti diatur ba Demak Fabrication Yard, Brooke Dockyard di Muara Tebas ditu,kemari.
PETRONAS nyerahka kontrak berega sepenyampau RM189 milion ngagai Brooke Docyard kena 25 April taun nyin kemari ungkup EPCC Pelantar enggau Jacket.
Pelantar enggau Jacket nya dilepaska Sapit Kepala Menteri ti mega Menteri pemansang Infrastruktur enggau Perengka Pengangkut Tan Sri Datuk Amar James Jemut Masing belayar, ba pengerami nya kemari.
Bejaku baru, Abdul Karim madahka nengah sukung ari PETRONAS, sida ulih ngadu sereta nembuka projek nya enggau HSE Excellence iya nya dalam 906,869 jam gawa enggau nadai Lost Time Incident (LTI).
Kelimpah ari nya, Mandal Presiden Group Project Delivery, PETRONAS Zakaria Kasah lebuh bejaku madahka PETRONAS bekerejasama enggau kompeni Sarawak dalam industri minyak enggau gis.
Iya madahka kerejasama enggau Brooke Dockyard dipejalaika kenyau 20 taun ke udah dalam mayuh bengkah projek.
“PETRONAS gaga bekerejasama enggau Brooke Dockyard sekali agi dalam projek Bokor enggau Anjung.
“Kenyau Final Investment Decision (FDI) dalam bulan April taun nyin kemari, Brooke Dockyard ngayan sereta ngamatka semaya dalam projek.
“Brooke Dockyard enggau PETRONAS deka terus nyukung orang ti bepengelandik ba nengeri tu,” ku iya.