Tetiap rumah sembiang ke ukai bepengarap Islam tau ngenataika peminta enggau penanggul nengah ADUN
KUCHING: Penanggul ti nyengkaum bekaul enggau jalai pengarap patut dikerandauka ngena chara engkeman, laban asil randau nya meri penguntung ngagai semua.
Sapit Kepala Menteri Datuk Amar Douglas Uggah ngelalau raban ti ukai bepengarap Islam nengah rumah sembiang diri empu, patut berandauka enda ngira nama penanggul, ke pemanah tauka penguntung semua.
Iya madah, pengari ari tetiap rumah sembiang ke ukai bepengarap Islam ulih ngenataika peminta sereta penanggul ke nuntung nengah Kaban Kunsil Nengeri (ADUN).
“Pagi tu kitai meda bisi ADUN ngarika sitak,lalu sida tu mega ke bebendar bejaku maya dalam Kunsil Nengeri (DUN) enggau baum ngambika UNIFOR (Unit Hal Ehwal Jalai Pengarap Bukai) diberi ungkup belanja ke mayuh, lalu pekara tu dikenataika ngagai YAB Kepala Menteri.
“Nya alai kitai patut beterima kasih ngagai ADUN, enda ngira nama penanggul ditapi, patut dikerandau laban asil randau nya deka meri penguntung ngagai semua,” ku iya.
Uggah ti mega Menteri Betanam Betupi Moden, Tanah Adat enggau Pemansang Kandang Menua mansutka pekara nya lebuh bejaku ba Pengerami Nyuaka Chek Rumah Jalai Pengarap Bukai 2018 (Fasa 2) ti diatur UNIFOR ba Bilik Baum Ringkat 20 Wisma Bapa Malaysia ditu, kemari.
Bekaul enggau pengawa nyuaka ungkup belanja nya, perintah nengeri nengah Unit Hal EhwalRumah Jalai Pengarap Bukai ( UNIFOR) Opis Kepala Menteri udah nyuaka sepenyampau RM19.44 juta ari RM20 juta dikena bejalaika 226 projek,ti diungkup ke taun 2018.
Ungkup belanja nya dikena ngaga sereta ngemanahka agi rumah sembiang ke ukai bepengarap Islam baka Kristian, Buddha, Hindu, Sikhs, Bahai enggau Taoist di serata nengeri tu.
Kemari,ba fasa kedua nengah Kaban Kunsil Nengeri (ADUN), Uggah nyuaka sepenyampau RM1.82 juta dikena mantu 13 projek rumah sembiang ukai bepengarap Islam serata nengeri tu.
Lalu laluh fasa kedua ti sepenyampau RM1.75 juta ungkup tujuh projek udah disuaka apin lama.
“Nya alai kitai ngarapka di Sarawak kitai beterima kasih ngagai YAB Kepala Menteru Datuk Patinggi Abang Johari Tun Openg laban iya nyukung penuh penumbuh UNIFOR nengah chara meri ungkup belanja.
“YAB Kepala Menteri nemu rumah sembiang di Nengeri Sarawak patut dibantu ari sukut ungkup belanja sekalika dikena ngemanah tauka ngaga baru rumah sembiang.
“Lalu tanggungpengawa kami (UNIFOR) keterubah iya nya mantu ngaga rumah ukai bepengarap Islam di serata Sarawak,” ku iya seraya ngarapka ungkup belanja nya dikena enggau engkeman.
Ba fasa keterubah sepenyampau RM15.87 juta udah dikemendar sereta disuaka dikena bejalaika 206 projek ti meri penguntung ngagai mayuh bengkah rumah sembiang di serata nengeri tu.
Laluh ungkup belanja ke tuju projek tu ba taun 2018 sepenyampau RM560,000 deka diberi ba fasa ketiga ti dipelabaka diberi ujung bulan tu.
Sama bisi datai ba pengerami nya, Direktor UNIFOR Datu Dr Ngenang Janggu enggau Sapit Sekretari Perintah Nengeri Datu Jaul Samion sereta ke bukai.
Pagi tu kitai meda bisi ADUN ngarika sitak,lalu sida tu mega ke bebendar bejaku maya dalam Kunsil Nengeri (DUN) enggau baum ngambika UNIFOR (Unit Hal Ehwal Jalai Pengarap Bukai) diberi ungkup belanja ke mayuh, lalu pekara tu dikenataika ngagai YAB Kepala Menteri. Datuk Amar Douglas Uggah Sapit Kepala Menteri Sarawak