Kelebih agi pengundi biak ngambika enda saru enggau semaya parti tu ti deka ngetan hak Nengeri Sarawak
KUCHING: Raban nembiak sereta kelebih agi pengundi biak dikeingat ngambika enda mudah dikeruga tauka saru enggau semaya parti ari ‘luar’ Sarawak, lebih agi bekaul enggau semaya sida ngetanka Sempekat Malaysia 1963 (MA63).
Kaban Majlis Kerja Tetinggi (MKT) Parti Pesaka Bumiputera Bersatu (PBB) Dr Hazland Abang Hipni ngingatka pekara nya seraya madahka semina Gabungan Parti Sarawak ( GPS) ke amat bebendar dalam negika MA63.
GPS nyengkaum PBB, Parti Bersatu Rakyat Sarawak (SUPP), Parti Rakyat Sarawak (PRS) enggau Parti Demokratik Progresif (PDP).
“GPS ti nyengkaum PBB, SUPP, PRS enggau PDP ti amat bebendar ngetanka hak orang Sarawak sereta MA63.
“Nya alai raban nembiak lebih agi pengundi biak dikeingatka ngambika enda mudah tekeruga runding sereta saru enggau semaya ke diberi parti ‘luar’ Sarawak ti madahka deka ngetan hak rayat enggau nengeri nengah MA63.
“Ingat meh, hak kitai dalam MA63 patut diberi pulai baru ngagai kitai rayat Sarawak nengah GPS ke amat bebendar ngetanka hak Sarawak,” ku iya apin lama.
Dr Hazland ti mega Kaban Kunsil Nengeri ( ADUN) Demak Laut mansutka pekara nya lebuh ti bejaku sereta bejadika Padang Futsal Kampung Tanjung Bako ditu.
Ngenang pasal Padang Futsal nya, Dr Hazland madahka nya sebengkah ari Projek Transformasyen Menua Pesisir (RTP) 2017 ke dipejalaika nengah iya ke nyadi ADUN Demak Laut ti beungkus sepenyampau RM200,000.
“Kitai deka ngemanahka agi padang futsal ti dari semasa ke semasa,” ku iya seraya madahka taun tu ba DUN Demak Laut bisi lima projek ngaga padang futsal udah dikemendar sereta digaga dalam taun tu.
Lima padang futsal nya digaga ba lima buah genturung pendiau iya nya Kampung Pinggan Jaya; Kampung Muhibbah; Kampung Semilang; Kampung Bako Hijrah enggau Kampung Bako Hulu.
Kelimpah ari nya lebuh ti ngenang pasal projek pintu ai ke ditanya Ketuai Kaum Tanjong Baku Rajidin Narawi, Dr hadzlan madahka projek nya udah dikemendarka taun tu ke beungkus RM150,000 sereta enda tau enda tembu taun tu.
Lalu penembu projek pintu ai nya ila deka ulih mutarka penanggul ampuh bah ke nuntung ba padang futsal enggau sekeda rumah, maya pasang nyadi, ku iya.
Berebak enggau tu iya mega meri perambu ngambika Komiti pemansang enggau pengelikun genturung Pendiau (JKKK) ngaga sebuah Pusat Khidmat Komuniti Kampung ba Kampung Tanjung Bako, ke alai Pusat Khidmat nya ulih dikena raban orang indu, JKKK, PBB, Saberkas sereta gerempung ke bukai bejalaika licha, bengkel enggau aktviti bukai.
Iya mega minta JKKK Kampung Tanjung Bako nganjung peminta rasmi bekaul enggau peminta ngaga padang main bol enggau gelanggang sepak takraw ngagai perintah nengeri.
Nya alai raban nembiak lebih agi pengundi biak dikeingatka ngambika enda mudah tekeruga runding sereta saru enggau semaya ke diberi parti ‘luar’ Sarawak ti madahka deka ngetan hak rayat enggau nengeri nengah MA63. Dr Hazland Abang Hipni Kaban MKT PBB