Makit Sentral Sibu dipadu makit ke pemadu besai di Malaysia

SIBU: Mengeri tu semampai berasai temegah ati ngembuan Makit Sentral Sibu ketegal ti dipadu makit ke pemadu besai ba Malaysia.

Sapit Chairman Opis Kaunsil Sibu (SMC) Rogayah Jamain madah, mengeri tu nyangka mit ari mengeri bukai tang bisi makit pemadu besai.

“Kami semampai temegah sereta semampai ngelakuka nama Makit Sentral Sibu,” pia ku iya bejaku maya nerima penatai lebih 20 iku raban pengereja pengawa Majlis Bandaraya Petaling Jaya ( MBPJ) ti nemuai ke Makit Sentral Sibu, kemari.

Penatai raban tu betuaika Director of Waste Management MBPJ Lee Li Shyan.

Penemuai sida maya tu deka meda Makit Sentral Sibu kelimpah minta bedua penemu ari SMC chara megai makit ke pemadu besai di Malaysia nya.

Awak tu mega dikena Rogayah madahka SMC ti megai tanggungpengawa ngatur makit nya endang semampai nerima kerejasama ke manah ari raban bukai lebih agi ari Gerempung Orang Bedaja Sibu.

“Kelimpah ari nya, SMC mega ngembuan kaul ke manah enggau pangan diri antara bala kaunsilor sereta raban pengereja pengawa SMC ti nentuka pengawa ngatur makit tu semampai mujur sereta nadai bepenanggul,” ku iya madah baru.

Nambahka nya ku iya, kerejasama ari gerempung bela besai reti nyaup SMC ngatur makit nya nyengkaum ba pekara pemeresi enggau pengelikun.

“Kami bela ransing ngemanahka makit tu lalu pechaya mayuh pengawa ngemanah deka diatur nangkan ke tu enda lama agi bepun ke udah diungkupka RM3 juta ari Kepala Menteri maya iya nemuai ke Sibu suba,” pia ku iya.

Naka ke diatu, makit tu bisi 1,174 iti mija alai bejual, 200 ngagai 300 lot bejual ba tamu sereta 200 ngagai 300 lot alai bejual maya musin buah.

Tiap iti bansa dagang ti dipejalaika ba makit tu ditetapka bayar RM120 tauka RM240 setaun (lisin), RM60 nyentuk RM150 tiap suku taun (siwa), RM5 nyentuk RM25 sebulan (ai) enggau RM5 sebulan (karan).