Perintah nengeri betuaika Kepala Menteri meri bantu,berati lalu mutarka penanggul rayat nyengkaum jalai pengarap, ku Uggah
KUCHING: Gabungan Parti Sarawak ( GPS) ti nyadi perintah sereta ngiring nengeri tu ngemeranka polisi ti mungkur semua pekara sereta enda bepilih bansa rayat.
Polisi perintah nengeri kitai iya nya polisi ti mungkur semua pekara, reti nya YAB Kepala Menteri deka nentuka semua rayat Sarawak enda milih bansa enggau jalai pengarap meseti dibantu. Datuk Amar Douglas Uggah Embas Sapit Kepala Menteri
Sapit Kepala Menteri, Datuk Amar Douglas Uggah Embas madahka, perintah nengeri ti betuaika Kepala Menteri Datuk Patinggi Abang Johari Tun Openg meri bantu sereta berati lalu mutarka penanggul rayat, nyengkaum bekaul enggau jalai pengarap.
Pekara nya ulih dipeda enggau nyata lebuh perintah nengeri setuju numbuhka Unit Hal Ehwal Jalai Pengarap Bukai (UNIFOR), iya nya unit ti ngemata sereta mantu raban bansa ti ukai bepengarap Islam.
“Polisi perintah nengeri kitai iya nya polisi ti mung- kur semua pekara, reti nya YAB Kepala Menteri deka nentuka semua rayat Sarawak enda milih bansa enggau jalai pengarap meseti dibantu.
“Penanggul rayat meseti dikemeratka perintah kitai di Sarawak, tu mega siti polisi ti bisi dipeda kitai ti dipejalaika diatu sereta deka diteruska.
“Baka UNIFOR siti peluang endur kitai berandau, enda lama agi kitai deka nganggauka pengari gereja lalu berandauka nama ti patut dipejalaika perintah nengeri ngambika penanggul ke ditapi rayat sereta jalai pengarap ulih diputarka,” ku iya ti nadai madahka timpuh betemu nya.
Uggah ti mega Menteri Betanam Betupi Moden, Tanah Adat enggau Pemansang Kandang Menua mansutka pekara nya lebuh ti bejaku ba Pengerami Nyuaka Chek Rumah Jalai Pengarap Bukai 2018 (Fasa 2) ti diatur unit nya ba Bilik Baum opis menteri nya di Ringkat 20 Wisma Bapa Malaysia ditu, kemari.
UNIFOR ditumbuhka kena 26 mei 2017 ti nyadi unit baru ba Opis Kepala Menteri ari baruh portfolio Sapit Kepala Menteri Datuk Amar Douglas Uggah Embas.
Penumbuh UNIFOR iya nya sebengkah ejensi perintah nengeri asil ari penemu tauka runding niang Pehin Sri Adenan Satem lebuh ke nyadi Kepala Menteri, ti megai tanggungpengawa nyaga polisi dikena ngelakuka pemaik enggau pengelantang entara pengarap kelimpah ari merambu sereta ngaga serangkung polisi, undangundang enggau atur ti bekaul enggau pekara jalai pengarap ukai Islam di Sarawak.
UNIFOR deka nyadi pelasar alai ngenataika peminta ngulihka belanja sereta tanah dikena ngaga gerija tauka kuil baru tauka ngemanahka.
“Kitai Nengeri Sarawak amat betuah laban perintah kitai perintah GPS ti diiring YAB Abang Jo neruska pengawa ke dipejalaika niang Tok Nan sebedau tu, nyukung penuh penumbuh UNIFOR.
“Ukai semina nya aja, YAB Abang Jo mega udah ngemendarka sebidang tanah ba Jalai Ong Tiang Swee pemesai tiga ekar endur kitai ngaga rumah UNIFOR laban nya lambang penumbuh unit tu ba Sarawak.
“Rumah UNIFOR nya mega nyadi ruang endur kitai ngaul pangan diri sereta entara perintah enggau rayat mutarka penanggul ke ditapi rayat, laban polisi perintah iya nya mutarka penanggul rayat awakka ulih idup dalam pemaik seraya ngemeranka jalai pengarap diri empu,” ku iya seraya madahka jalai pengarap pekara ti dikemeratka perintah nengeri.
Sama bisi datai ba pengerami nya kemari, Direktor UNIFOR Datuk Dr. Ngenang Janggu sereta Sapit Sekretari Perintah Nengeri Datu Jaul Samion enggau Kaban Kunsil Nengeri (ADUN) ti ngarika gereja.