Opis bekuasa dipinta chakah agi mutarka pengelekai penyakit rabies
MIRI: Operasi nagang sereta nyeliah igi penyakit rabies enggau ukui lelang ditu patut balat agi dipejalai lalu ukai semina jaku ngapa sereta randau ti semina deka tembu ba mija aum aja.
Presiden Serakup Penguna Miri (CAM), George Francis madahka pemutus ti positif meseti asil ari aum enggau pengawa ti dikerandau, dikena matau igi penyakit nya lalu nentuka Miri nadai dikelekai rabies, sereta nyadi sebuah mengeri ti likun sereta beresi.
“Raban bekuasa tauka opis menteri bekaul patut ngemalatka agi pengawa sida nagang penyampau ukui lelang enggau munaska igi penyakit nya.
“Enti nya begunaka belanja dikena nentuka pengawa nya dijapai, anang kakang ngena belanja besai laban tu ngaul nyawa mensia enggau pengerai mensia mayuh ditu,” ku iya madah ngagai Utusan Borneo lebuh dipinta ngenang pasal isu rabies ti nyadi buah randau ba bagi menua tu, pengudah dua kandang endur di Miri, dituku bisi ukui positif rabies.
Ku Geroge, nitihka pematut raban bekuasa udah bisi bejalaika atur terit dikena nagang igi penyakit nya, laban tu datai ari Serian, menua adap ke Selatan nengeri tu dalam taun nyin tadi, berengkah ngelekai ari pasar mit nya nyentuk ke bagi menua bukai lalu igi penyakit tu udah ditemu bisi nyadi di Miri.
“Ku iya, ‘chara gawa’ ngena jaku aja tauka randau dikena berandau ba mija aum aja tauka ripot betulis ari raban bekaul, enda deka mutarka penanggul tu, tang neritka Standard Operation Prosedur (SOP), endang beguna amat dikena mutarka igi penyakit nya.
Ngenang silik isu nya, iya nyemetak madah semua raban ti ngaul diri ba kimpin tu, kelebih agi Majlis Bandaraya Miri ( MBM) enggau unit penerit adat ke bukai ti mutarka ukui tauka jelu bukai, patut chakah agi gawa nyentuk ke tagit nya dijapai (nagang igi penyakit) lalu nadai ukui lelang ti bekedayau nyauka ba semua palan komersial di mengeri tu, enggau nadai ngira gaya pekara ba genturung pendiau ti sekut.
Ku iya, ukui kelebih agi ti bekedayau, nadai orang nginang, tau amat ngeruga pengelikun sida ti bedarat, kelebih agi nembiak mit enggau orang ti diau ba sekeda genturung pendiau sereta bekedayau ba sebelah kedai kupi.
“Tang ukui ti bisi orang nginang, tebal agi dikurung dalam kandang rumah,enda bechampur enggau ukui siga ba luar, sereta mantu ngurangka igi penyakit rabies tu ngelekai,” ku iya.
Ku iya, unit penerit adat MBM, patut chakah agi mutarka isu rabies enggau ukui lelang tu, laban kitai agi ulih meda ukui tu bekedayau sebelah endur diau, kedai makai, belakang rumah kedai enggau ke bukai.
“Sida nitihka SOP ti ditetap dikena mutarka isu nya lalu ngena semua pekara ti bisi enggau atur ti patut,” ku iya nambah, seraya ngarapka igi penyakit ti tau nabanka nyawa ulih diputar.