Bisi sekeda raban ti enda lurus bejalaika pengawa deka beambi ulih ti ngujungka rayat enda ngasaika pemaik tu
MIRI: Raban penerit adat Opis Menteri Dagang Dalam Menua, Koperasi enggau Orang Bebelika Barang (KPDNKK) patut terit sereta suah agi meresa lalu nentuka barang ti diberi subsidi ari perintah, datai ngagai raban ti patut nerima, ke endang patut bulih pemaik.
Sapit Menteri Dagang Dalam Menua enggau Orang Bebelika Barang, Chong Chieng Jen madah bisi sekeda pekara ke alai barang subsidi enda datai ngagai raban, berindik ari pengawa raban ti nadai lurus, ngujungka rayat nadai teulihka pemaik nya.
Nya alai, Chiong mega dekaka raban penerit adat opis menteri tu nentuka penanggul tu ulih diputar, ke alai barang subsidi ti enda datai ngagai rayat, patut diperesa (ari raban bekaul).
“Tu siti pemar ditapi kitai (pemesai opis menteri) nagang salah guna barang subsidi laban rayat ngelempaika pengandal tinggi ngagai kitai ngambika tetiap penyampau barang ti diberi subsidi enda salah guna raban ke enda lurus bejalaika pengawa,” ku iya.
Chong mansutka jaku nya ngagai staf opis nya, rambau pejalai ngagai opis menteri nya ditu, kemari.
Tu siti pemar ditapi kitai (pemesai opis menteri) nagang salah guna barang subsidi laban rayat ngelempaika pengandal tinggi ngagai kitai ngambika tetiap penyampau barang ti diberi subsidi enda salah guna raban ke enda lurus bejalaika pengawa. Chong Chieng Jen Sapit Menteri Dagang Dalam Menua enggau Orang Bebelika Barang
Bela nyempulang iya, Kaban Parlimen Miri, Dr Teo Yu Keng; ADUN Pujut Dr Ting Tiong Choon; Senator Alan Ling Sie Kiong; Sapit Direktor KPDNKK, Mohd Nawawi Abdul Rahman sereta Pemesai Penerit Adat Bagi Menua Miri, Joe Azmi Jamilti mega meri penerang ngagai Chong enggau sida sebuat.
Ba jaku dipansutka iya ngagai pemesai enggau penerit adat opis menteri nya ditu, Chong ngingatka sida ke alai opis menteri nya menggi tanggungpengawa meresa enggau nyidi enti bisi pengawa ti enda betul nyadi sereta nyemela antara pemerat bala penguna enggau pedagang, ngambika rayat ulih ngasaika pemaik barang ti disubsidi tu memanah.
Nya alai ku iya, pekara tu nyadi siti penguji ngagai tim penerit adat ari opis menteri dikena nagang barang ti diberi subsidi ungkup rayat ari disalah kena raban ti deka beambi ulih.
Berebak enggau nya, opis menteri mega patut nyemela subsidi ba menua tu.
“Opis menteri ke diatu napi pemar bejalaika pengawa lalu bisi maya kitai nyibil peminta pengguna tang pekara pemadu beguna iya nya nyemelaka subsidi ba menua tu,” ku iya.
Nitih ku Chong, perintah besai melanja RM90 juta meri subsidi barang ti diguna enggau servis ba Sarawak ngambika rayat ba nengeri tu ulih ngasaika pemaik skim nya.
Ku iya, pengawa ti sama dipejalai opis menteri enggau tuju nentuka rayat bulih pemaik ari subsidi nya lalu pengawa meresa dipejalaika raban sida tetemuka setengah ari penguna ti bulih pemaik nya laban ditipu sekeda raban ti salah guna subsidi ti diberi perintah.
Ba lansa bukai, Chong, ti mega Kaban Parlimen Stampin, bela nerima penemu tauka perambu ari bala staf opis menteri nya pasal pengawa enggau baka ni chara nentuka penyikar sistem ti bisi diatu ulih ngemai sida ngagai tikas bukai mutarka isu penyelewengan nya.
“Kitai patut datai enggau pekara baru sereta enggau perintah baru tu, kitai meseti bisi polisi baru dikena mutarka penanggul ti ditapi pengguna, datai ari perintah sebedau tu,” ku iya nambah.
Ku Chong, diatu menua kitai ngasaika ubah perintah lalu ngengkahka ‘perintah lama’ ba belakang sereta Perintah Pakatan Harapan (PH) ti baru deka bejalaika pengawa mutar enggau bejalaika sistem ti tau meri pemaik ngagai rayat.
Iya nyemetak madah perintah baru enda ‘ membalas dendam’ tang deka ngena awak enggau mandat ti diberi rayat kena mulaika pengandal rayat nuju pengelantang menua enggau ngerichahka agi ekonomi menua.