Dipenyadika Tun Pehin Sri Abdul Taib Mahmud kena Hari Enam tu
KUCHING: Bup Malin Ngajar Anak Mit ba Rumah dalam jaku Mandarin enggau Iban deka dipenyadika Tuai Pemegai Menua (TYT) Nengeri Tun Pehin Sri Abdul Taib Mahmud beserimbai enggau pengerami Konvensyen Pelajar Prasekula Ke-12 kena Hari Enam tu.
Menteri Pengintu Pendiau, Pengelantang Komuniti, Orang Indu, Ruang Bilik enggau Pemansang Anak Mit Dato Sri Fatimah Abdullah madah bup nya deka nyendiaka penerang ke ulih ditunda nyadika malin ngagai indai ke agi biak lebih agui chara nyaga anak mit baruh tiga tuan ba rumah.
“Lebih 80 peratus apai indai ba nengeri tu milih ngibun anak diri empu ba rumah sekalika dijaga diri sebilik tauka ama.
“Nyadi kami (opis menteri) nyelak Bup Malin Ngajar Anak Mit nengah jaku Iban enggau Mandarin ke disalin ari bup asal dikarang dlam Jaku Melayu,” ku iya.
Iya madah munyi nya rambau aum pemberita pengudah bechairmanka aum Komiti Pengatur Konvensyen Pelajar Prasekula Ke-12 ditu kemari.
Ngelansa pasal konvensyen taun tu, Fatimah madah urung 450 iku pesereta deka ngambi bagi dalam program ke diatur pengelama tiga hari nya bepun sehari tu nyentuk Hari Minggu ba Hotel Pullman Kuching.
“Tiga keretas kereja deka dibantai iya nya ‘ICT Dalam Pengajaran dan Pembelajaran’, ‘ICT: Ketagihan Kepada ICT?’ enggau ‘Penggunaan Teknologi Maklumat dan Komunikasi sereta ‘Pentaksiran Pendidikan Awal Kanak-Kanak’.
“Pengawa milih topik tu setipak enggau rambai jaku konvensyen taun tu iya nya ‘ Pendigitalan Asuhan dan Didikan Awal KanakKanak’,” ku iya.
Kenu ku iya, sebengkah forum bela diatur diberi topik ‘Memperkasakan Pendidik Pendidikan Awal KanakKanak Melalui Latihan dan Atas Talian’ enggau ditangkan tujuh bengkel bekaul nguna teknologi pemadah enggau penyambung dalam ngajar sereta meri penemu tumu ngagai anak mit.
“Ba pengerami kena 6 Oktober ila, pemenang ungkup ‘benchmarking’ deka dipadah lalu perais champion iya nya RM6,000, lumur dua RM5,000 enggau lumur tiga RM4,000.
“Sebelas palan pelajar tumu anak mit udah dichalun ungkup ‘benchmarking’ selampur Sarawak ti bepun 25 Mei 2018,” ku iya.
Sama bisi datai Menteri Muda Indu, Ruang Bilik enggau Pemansang Anak Mit Rosey Yunus enggau Sekretari Mendam KWKPK Dr Saadiah Abdul Samat.