Tusah senang sekumbang nyadi soldadu meruran dikenang Stephen
KOTA SAMARAHAN: Tinduk berujan ba dan kayu lebuh ngelaban raban penyelawai komunis, nyadi kenang enda ulih dibuai Panglima Medan Timur Leftenan Jeneral Datuk Stephen Mundaw sepanjai 41 taun gawa nyadi raban Soldadu Darat Malaysia (TDM).
Ku iya, bemacham kenang tusah senang udah diasai sekumbang gawa ba TDM ti enda ulih dibuai nyentuk sehari tu.
“Kitai tama kampung, nujah paya penalam naka tandan bau seraya chechegit mai senyata, ngagai komunis lebuh nya. Pengingat tu agi nyeruga dalam runding aku,” ku iya.
Iya mansutka jaku tu lebuh dirandau pengarang berita pengudah pengawa baris beserimbai enggau Penemuai Basa Panglima Medan Timur ngagai Markas 3 Briged Infrantri di Kem Muara Tuang ditu, kemari.
“Mayuh pekara udah diasai pengudah 41 taun gawa nyadi soldadu tu, ulih dikarang nyadi siti bup.
“Pekara ti agi ngeruga diasai dalam pengingat lebuh gawa ba RASCOM di Sibu rambau jeman Komuniti, ke alai aku maya nya agi nyadi pemesai biak begulai enggau bala bakih bukai, berambunka nyawa nyaga pengelikun kandang endur nya ari keruga komunis,”ku Stephen nambah.
Berindik ari nya, iya ngarapka raban TDM ditu nampung jasa sida gawa ngetanka pengelikun ti diasaika diatu.
“Lalau ari aku, tampung pengawa enggau bisi penger- an, lurus gawa enggau integriti nyadi raban soldadu darat laban enti kitai fokus enggau integriti, kitai ulih bejalaika pangku pengawa enggau meruan,” ku iya madah nyemetak.
Stephen diatu manggai umur 60 taun, pinchin wajib kena ujung bulan tu, pengudah ngiring Medan Timur, kenyau Mei tu tadi.
Kelimpah ari nya, iya ngingatka peranak nengeri tu bela begulai nyaga pengelikun ti diasai ail ari pengawa ditegi raban ke dulu.
Ku iya, nadai pengelikun, mar amat deka nentuka pemansang nengeri enggau menua tu ulih dipejalai.
Ngelansa pasal pemansang Medan Timur, ku Stephen, pemansang kandang menua nya deka chakah agi dipejalai enggau nambahka dua batilion agi ngagai Sabah, kelimpah nambah asset enggau perengka guna bukai.
Berebak enggau nya ku iya, pengawa numbuhka 31 Briged deka megai pangku pengawa nya pengelikun ba garis entara menua.
“Kitai ngarapka garis entara menua Sabah enggau Sarawak teguh agi ngambika kitai ulih matau pekara ti nyadi ba dia enggau meruan agi,” ku iya.
Pengawa baris nya ensana dipasuk 18 pemesai enggau 283 raban lain- lain pangkat diketuai Leftenan Kolonel Mohd Fau’at Mohd Yatim.
Sama bisi datai Panglima Satu Divisyen Mejar Jeneral Dato Toh Choon Siang, Panglima 3 Briged Brigadier Jeneral Mohd Bustaman Mat Zin sereta bala bukai.