Jaku Iban dikearap seikas enggau jaku bansa bukai
KUCHING: Pekit Pidato Jaku Iban Utusan Borneo (UB) meri awak ngagai raban nembiak sekula bela nyaup ngerembaika jaku Iban, ku champion kategori baruh 17 taun, Aderina Miloh.
Dekaka jaku Iban majak lati ba renggat antarabangsa, nembiak pom 4 SMK Song nya mega keran meda jaku tu seikas enggau jaku bansa bukai.
Berindik enggau nya, iya pechaya pekit pidato ke diatur Utusan Borneo tu meri awak ke besai ngagai semua orang kelebih agi nembiak sekula.
“Kami mega ulih mantaika pengelandik kami bejaku sereta meri pemerani ngagai kami bejaku ba mua bala mayuh.
“Enda mudah kitai bejaku enggau lanchar ba mua bala mayuh lalu pekit siti program ke manah dikena ngerembai jaku Iban,’ku iya lebuh dikerandau tembu pengawa nyuka perais pekit ensanus.
Temegah enggau pemujur ke ditempa, Aderina madah diri nyikap diri enggau tumu dikena napi pekit kelimpah dibantu raban pengajar.
Pengelandik bepidato ku Aderina datai ari pengerindu ba pengawa nya ke alai iya sigi netapka juluk ngarika sekula.
“Kebuah pia, ngambika nyadi chuan sereta teladan ngagai bala menyadi ke bukai alai kitai sama bela ngelatika jaku Iban nengah pekit pidato,”ku iya nambah.
Ungkup champian kategori tebuka Micheal Bandang ,21, pengangkun iya ngagai jaku Iban sereta pengingin deka ngelatika jaku diri nyadi pemun.
Pelajar Institut Pematih Pengajar (IPG)Kampus Batu Lintang nya pechaya pekit ulih nyungkak pengerindu nembiak ke jaku Iban.
“Arap agi ulih enggau bepekit ba taun ti deka datai. Aku ti enggau bepekit ukai ketegal ukai semuti deka bulih gelar champion.
“Tang peneleba enggau pengandal ati deka nyaguka jaku diri nya ti pemadu besai reti,’ku Micheal ke asal ari Rmh Muluk, klua Krian, Saratok.
Ba siri kedua peit ke diatur ba taun 2017, Micheal bulih gelar champian ba kategori universiti.
Pekit Pidato Jaku Iban Utusan Borneo (UB) siri kedua 2018 diatur di Auditorium Tun Ahmad Zaidi Adruce, IPG Batu Lintang ditu, ensanus lalu dibagi ngagai tiga kategori.
Ketetiga kategori iya nya kategori baruh umur 17(U17) taun, baruh umur 35(U35)enggau kategori tebuka.
Kategori U17 bejuraika topik ‘Segang Pemansang Dunya ICT Meri Penatai Pemisi Nengah Ekonomi Digital’ lalu kategori U35 bejuraika sentang ‘Pengangkun Ngetanka Leka Main Asal Ulih Nyungkak Pengelati Jaku Iban’.
Ungkup kategori tebuka, raban pemekit bejuraika ‘Jaku Lati, Bansa Pegari: Sapa Bempu Tanggungpengawa Ngelatika Jaku Iban’.
Ketetiga kategori nyendia perais mata duit RM2,500 besereta tropi ngagai champion, lalu lumur dua enggau tiga nerima RM1,500 enggau RM1,000 besereta tropi.