Kebuah pia laban pekara bekait enggau MA63 deka diterit enggau lengkas, ku Liew
KUCHING: Pekara ke bekait enggau Sempekat Malaysia 1963(MA63) deka diterit enggau lengkas, ku Menteri ba Opis Menteri Besai ( Pekara UndangUndang) Datuk Liew Vui Keong.
Bejaku ba aum pengarang berita di Begunan Sultan Iskandar ditu, kemari, iya madah petalat ke udah sentang MA63 nadai guna dipanjaika agi.
“Diatu kitai ( perintah) keran neritka pekara ke bekait enggau MA63.
“Petalat ke udah nadai guna dipanjaika agi lalu kitai meratka atur neritka MA63 enggau naka pengelengkas,”ku iya.
Dulu agi ari nya Liew ke ba penemuai kereja ke Kuching bisi ngelawa Komplek Kot Sarawak sebedau ngejang ke Begunan Sultan Iskandar.
Iya ngarap perintah diberi timpuh ngemujur semua pekara ke bekait ketegal MA63 seruran ba runding rayat Malaysia.
“Ke pemadu berat, Menteri Besai Tun Dr Mahathir Mohamad kena 16 September tu tadi di Kota Kinabalu udah netapka Sarawak enggau Sabah kaling ke sama hak enggau Malaya,’ku iya.
Berindik enggau nya, Liew madah siti komiti ‘ khas’ MA63 deka dibantaika ngagai kabinet ba minggu tu.
Komiti ‘khas’ nya ku iya dibagi ngagai tiga bengkah komiti iya nya komiti kereja, komiti teknikel enggau kom- iti pengemudi.
Nitihka penerang Liew, komiti pengemudi deka bechairmanka menteri besai lalu bela digulu kepala menteri ari Sarawak enggau Sabah nyengkaum menteri kabinet, luya menua enggau raban orang akedemik.
Komiti teknikel diarika Liew alai iya deka nyadi chairman begulai enggau luya menua sereta dibantu raban menteri kabinet enggau pengari ari Sarawak enggau Sabah.
Ungkup komiti kereja, Liew madah deka diarika raban pemesai perintah baka sida ketuai direktor enggau direktor.