Empat rumah panjai di Machan gaga udah bisi jalai menyana
KANOWIT: Lebih 40 taun udah nganti jalai manah ngelawa rumah panjai, baru diatu peranak empat buah rumah panjai ba jalai kebun besai kelapa sawit, Kelimut di Machan nengah jalai ti menyana.
Rumah panjai tu iya nya Rumah Shamsuddin, Rumah Melaka, Rumah Untol enggau Rumah Dim.
“Terima kasih ngagai ngagai Kaban Kunsil Nengeri (ADUN) Machan Allan Siden Gramong ti udah ngemanahka agi jalai ngelawa rumah panjai kami,” pia ku bala tuai rumah nya nengah penerang media, kemari.
Jalai tu ditengah sida datai ba Pasar Machan.
Sebedau tu, sida nadai chara bukai kelimpah nengah jalai kebun besai sawit nya ti enda manah sereta enda likun.
Kompeni sawit badu agi ngintu jalai ke ditengah sida nya ketegal bisi pekara bukai nyadi.
Ku sida, maya musin ujan, jalai nya suba endang enda ulih ditengah kerita mit.
Kilah ensana, Allan begulai enggau raban parti iya datai ngelawa meda projek jalai nya nya.
Jalai nya diatu udah disemin nyentuk datai ba simpang jalai besai ngelawa Pasar Machan.
“Taja pan ex- ADUN Machan ti mega apai Allan, Datuk Gramong Juna enda ngaga jalai tu tang anak iya udah nampung pengawa nyadi pengari rayat.
“Tu utai ti dikedeka kami sereta ngarapka Allan semampai ransing bejalaika tanggungpengawa ti empai digaga apai iya suba,” ku iya sida.
Sebedau tu, maya pengawa bepilih suba, pengar rayat dia besemaya deka ngemanahka jalai urung 12 kilometer nya ari Rumah Shamsuddin, Nanga Semayam terus ngelawa simpang jalai Machan/ Kanowit enggau puku projek RM1.6 juta.