SDNU Krian mujur ditumbuh kena nangkup pinta komuniti

SARATOK: Gerempung Bansa Dayak Sarawak ( SDNU) Pampang Krian udah ditumbuh apin lama ke udah dikena nangkup peminta komuniti Dayak kelebih agi ba kandang menua Krian.

Batang tuju pampang nya dikena nyaup SDNU pampang Saratok enggau Roban bisi diatu, pia ku Chairman SDNU Krian Banyi Beriak kemari.

Pampang nya mega udah numbuhka bemacham komiti mit baka Ekonomi, Pekara Rama enggau Main Asal, Pelajar, Pekara UndangUndang enggau Gawa Ngiga Belanja.

Banyi deka disaup sapit iya, Frederick Sebungkok Jamit, Sekretari Entinggie Tamin enggau Tukang Wang Albert Renggian. Rintai bala ketuai pampang bukai iya nya Penulung Sekretari Vincent Osaka Solomon enggau Penulung Tukang Wang Sudok Mesa sereta mega kaban komiti bukai, Tuai Rumnah (TR) Josephine Entira, TR Serudin Ason, TR Julius Enggan, TR Majid enggau Lucy Kayan.

Ku Banyi, pampang nya mega udah nitihka pematut rejista nyadi serakup gawaka 1,300 iku kaban.

“Naka diatu, kitai udah ngambi 1300 iku nyadi kaban ngambika dianjung ngagai Indu Opis SDNU. Rambau aum kami apin lama ke udah, bemacham aktiviti udah diperambu lalu timpuh ngatur aktiviti tu deka dirandau ba aum udah tu, dalam bulan Januari taun baru,” ku iya.

Banyi madah aum Hari Enam tu tadi ba Victoria Inn Saratok udah digulu urung 60 iku kaban.

“Aum berengkah urung pukul 5 lemai lalu pengudah baum, bala kaban dinah makai lemai ba endur ti sama. Batang pengawa bukai lemai nya iya nya licha pasal ubah Kanun Tanah ba tanah NCR dikenataika Luyar Henry Joseph Usau,” ku iya nambah.

Gempung besai SDNU deka ngatur Aum Besai Tiga Taun Sekali (TGM) beberapa bulan agi dikena milih kaban kunsil supreme baru ungkup penggal baru tiga taun pengelama.